Përcaktohen kriteret për funksionim e instituteve dhe njësive të veçanta të kërkimit shkencor
Nga OraNews Përditësimi i fundit 19 Mars 2026, 21:42
Këshilli i Ministrave vendosi sot përcaktimin e kritereve dhe procedurave të kërkimit shkencor, që financohen nga fondet publike.
Me propozim të ministrit të Arsimit, ky vendim përcakton kriteret, procedurat, periodicitetin dhe metodologjinë e vlerësimit të përmbushjes së kushteve dhe të kritereve të funksionimit të instituteve dhe njësive të veçanta të kërkimit shkencor, të cilat financohen nga fonde publike, si dhe llojet e masave në rast të mospërmbushjes së kushteve dhe të kritereve të funksionimit.
Ky vendim zbatohet për të gjitha institutet dhe njësitë e veçanta të kërkimit shkencor, që janë krijuar në bazë të ligjit “Për shkencën dhe kërkimin shkencor në Republikën e Shqipërisë”, dhe që financohen plotësisht ose pjesërisht nga fonde publike apo sipas një marrëveshjeje të posaçme financimi.
Sipas KM, ky vendim zbatohet edhe për projektet e kërkimit të financuara nga programe të huaja, kur financimi kombëtar bashkëkontribuon në buxhet.
“Vlerësimi i përmbushjes së kushteve dhe kritereve të funksionimit të instituteve dhe njësive të veçanta të kërkimit shkencor të financuara nga fonde publike realizohet nga ministria përgjegjëse për çështjet e shkencës dhe kërkimit shkencor”, thuhet në vendim.
Ngarkohen ministria përgjegjëse për çështjet e shkencës dhe të kërkimit shkencor, institutet dhe njësitë e veçanta të kërkimit shkencor për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
