Izraeli dërgon më shumë trupa në jug të Libanit, ndërsa tensionet përshkallëzohen

Nga OraNews Përditësimi i fundit 3 Mars 2026, 21:45

Izraeli ka dërguar sot trupa shtesë tokësore në jug të Libanit, ndërsa milicia e mbështetur nga Irani, Hezbollahu, deklaroi se “epoka e durimit” ndaj Izraelit ka përfunduar.

Zëdhënësi i ushtrisë izraelite, Nadav Shoshani, tha se lëvizjet e trupave janë të kufizuara në shtrirje dhe nuk përbëjnë një ofensivë të plotë tokësore.

“Dua të theksoj se kjo nuk është një manovër apo ofensivë tokësore. Është një masë taktike për të parandaluar sulmet nga Hezbollahu”, tha ai, duke paralajmëruar për mundësinë e përshkallëzimit të mëtejshëm.

Shoshani nuk bëri të ditur numrin e trupave të angazhuara.

Deri më tani, forcat izraelite ishin të dislokuara në pesë poste në jug të Libanit, por tashmë kanë marrë pozicione shtesë pranë kufirit.

Sipas ushtrisë izraelite, këto pika ndodhen në lartësi strategjike mbi komunitetet izraelite, të cilat mund të shënjestrohen nga Hezbollahu me raketa apo tentativa infiltrimi.

Nga ana tjetër, një burim sigurie libanez bëri të ditur se ushtria libaneze ka rishpërndarë personelin nga disa pozicione të avancuara pranë kufirit për shkak të përkeqësimit të situatës së sigurisë.

Hezbollahu sinjalizon rikthimin e përballjes

Nënkryetari i këshillit politik të Hezbollahut, Mahmoud Qmati, deklaroi se periudha e vetëpërmbajtjes pas armëpushimit të vitit 2024 kishte marrë fund.

Ai akuzoi qeverinë libaneze se ka dështuar të mbrojë vendin nga sulmet izraelite.

“Epoka e durimit ka përfunduar, duke na lënë pa zgjidhje tjetër veçse t’i rikthehemi rezistencës”, tha Qmati, duke theksuar viktimat dhe shkatërrimet e fundit pas sulmeve izraelite në disa zona të Libanit, përfshirë Bejrutin.

Sipas Hezbollahut, grupi ka ndërmarrë dhjetëra sulme me raketa dhe predha drejt territorit izraelit gjatë dy ditëve të fundit.

Qëndrimi i qeverisë libaneze

Qeveria e Libanit shpalli dje të paligjshme “aktivitetet ushtarake” të Hezbollahut, duke shënuar një ndryshim të rëndësishëm në qasjen ndaj grupit.

Presidenti libanez, Joseph Aoun, deklaroi se ky vendim ishte i pakthyeshëm.

Gjatë bisedimeve me grupin e Kuintetit – i cili përfshin ambasadorët e Francës, Shteteve të Bashkuara të Amerikës, Katarit, Arabisë Saudite dhe Egjiptit — Aoun e përshkroi vendimin si përfundimtar.

Komiteti i Kuintetit për Libanin – i përbërë nga SHBA-ja, Franca, Arabia Saudite, Egjipti dhe Katari – është një koalicion ndërkombëtar që punon në mënyrë aktive për të stabilizuar Libanin gjatë krizave të tij të rënda politike, ekonomike dhe të sigurisë.

Lëvizjet izraelite dhe shqetësimi i OKB-së

Misioni paqeruajtës i OKB-së në Liban, Forca e Përkohshme e OKB-së në Liban (UNIFIL), bëri të ditur se ka vëzhguar ushtarë izraelitë duke hyrë në zona libaneze pranë Markaba, Al Adeisse, Kfar Kela dhe Ramyah, përpara se të ktheheshin në jug të të ashtuquajturës “Vija Blu”, kufiri jozyrtar mes dy vendeve.

Sipas UNIFIL, që nga konflikti i fundit, ushtria izraelite ka mbajtur pesë pozicione dhe dy “zona tampon” brenda territorit libanez, në kundërshtim me Rezolutën 1701 të Këshillit të Sigurimit të OKB-së.

Misioni raportoi gjithashtu disa sulme ajrore, qindra shkëmbime zjarri përgjatë “Vijës Blu” dhe 84 shkelje të hapësirës ajrore.

Ministri izraelit i Mbrojtjes, Israel Katz, deklaroi se ai dhe kryeministri Benjamin Netanyahu kishin autorizuar zgjerimin e pranisë ushtarake për të siguruar “pozicione strategjike shtesë” dhe për të parandaluar sulmet ndaj komuniteteve kufitare izraelite.

Përshkallëzim rajonal

Situata është tensionuar më tej pas ofensivës së gjerë të nisur nga SHBA-ja dhe Izraeli kundër Iranit, që çoi në sulme hakmarrëse me raketa nga Teherani ndaj bazave amerikane në disa shtete të Gjirit.

Në zhvillimet më dramatike, lideri suprem iranian, Ali Khamenei, u raportua i vrarë gjatë sulmeve.

Si reagim, Hezbollah hapi një front të ri duke lëshuar raketa drejt Izraelit, ndërsa Izraeli u kundërpërgjigj me sulme ajrore ndaj objektivave të grupit në Liban, përfshirë në Bejrut.

Sipas OKB-së, të paktën 30 000 persona janë zhvendosur nga shtëpitë e tyre që prej së hënës për shkak të përshkallëzimit të luftimeve, duke rritur frikën për një konflikt të ri të gjerë në rajon.