Anglezët “të çmendur” pas Alvarez! Arsenal e Chelsea, përditësime javore për sulmuesin argjentinas. Atletico Madrid kërkon mbi 100 mln paund
Nga OraNews Përditësimi i fundit 23 Shkurt 2026, 14:05
Arsenal dhe Chelsea po shtyjnë fort për transferimin e Julian Alvarez nga Atletico Madrid. Sulmuesi argjentinas preferon Barcelonën, por klubi katalanas nuk ka garanci financiare për të mbyllur marrëveshjen. Atletico ka vendosur afat deri në gusht dhe kërkon mbi 100 milionë paund për ta lënë të lirë.
Julian Alvarez është kthyer në një nga emrat më të nxehtë të merkatos verore. Sipas burimeve pranë negociatave, Arsenal dhe Chelsea po marrin përditësime javore për situatën e sulmuesit të Atletico Madrid, ndërsa gara për firmën e tij intensifikohet.
Atletico është i vetëdijshëm se lojtari po shqyrton të ardhmen dhe nuk dëshiron që çështja të zvarritet gjatë gjithë verës.
Drejtuesit madrilenë kanë bërë të qartë se çdo transferim duhet të mbyllet brenda gushtit dhe se çmimi nuk do të jetë i ulët. Klubi kërkon mbi 100 milionë paund, një shumë e krahasueshme me shitjen rekord të Antoine Griezmann te Barcelona.
Preferenca e Alvarez mbetet Barcelona, ku ka pasur kontakte me presidentin Joan Laporta dhe drejtorin sportiv Deco. Megjithatë, pasiguritë financiare të klubit katalanas mund të hapin derën për një transferim në Premier League.
Burime pranë operacionit bëjnë të ditur se, nëse largohet nga Spanja, destinacioni më i mundshëm është Londra. Arsenal dhe Chelsea e konsiderojnë argjentinasin një lojtar elitar, me eksperiencë në kampionatin anglez.
Arsenal madje po shqyrton mundësinë për të përfshirë lojtarë si Gabriel Jesus apo Gabriel Martinelli në marrëveshje, për të ulur kërkesën financiare të Atletico-s.
Ndërkohë, lidhjet e drejtorit sportiv Andrea Berta në Madrid mund t’i japin “Topçinjve” një avantazh në garë.
E ardhmja e Alvarez pritet të vendoset në javët në vijim, me klubet angleze që janë gati të lëvizin shpejt.
