Mosmarrëveshjet SHBA-BE/ Kallas: Marrëdhëniet transatlantike pësuan goditje, por Evropa nuk dorëzohet
Nga OraNews Përditësimi i fundit 22 Janar 2026, 20:07
Përfaqësuesja e lartë e Bashkimit Europian, Kaja Kallas, ka deklaruar se marrëdhëniet transatlantike midis Evropës dhe Shteteve të Bashkuara kanë pësuar një goditje të rëndë javën e kaluar, por Evropa nuk do të hedhë poshtë dekada të tëra bashkëpunimi të mirë.
Kallas bëri këto deklarata gjatë mbërritjes së saj në Samitin e BE, duke theksuar se mosmarrëveshjet e fundit nuk duhet të minojnë marrëdhëniet e qëndrueshme ndërmjet aleatëve.
Ajo shtoi se çdo përçarje midis SHBA-së dhe BE-së u shërben vetëm kundërshtarëve strategjikë të bashkësisë ndërkombëtare.
“Marrëdhëniet transatlantike pësuan një goditje të rëndë javën e kaluar. Por Evropa nuk dëshiron të hedhë poshtë 80 vjet marrëdhënie të mira për shkak të mosmarrëveshjeve.
Sondazhet tregojnë se shumica e amerikanëve e konsiderojnë Evropën aleatin e tyre kryesor.
Çdo përçarje midis aleatëve, midis SHBA-së dhe Evropës, u sjell dobi kundërshtarëve tanë”, tha Kallas.
Deklarata e saj vjen në një moment kur marrëdhëniet transatlantike po përballen me sfida diplomatike dhe politike, duke bërë që aleatët të jenë më të kujdesshëm në koordinimin e politikave të jashtme dhe strategjive të sigurisë.
Kallas nënvizoi gjithashtu rëndësinë e bashkëpunimit të vazhdueshëm në fusha si siguria, ekonomia dhe mbrojtja e rendit ndërkombëtar.
