SPAK NË OFENSIVË/ Gjyli: Duhen tejkaluar konfliktet mes mazhorancës dhe opozitës për të mirën e përbashkët
Nga Katerina Hysenllari Përditësimi i fundit 15 Janar 2026, 15:50
E ftuar në studion e Ora News, analistja Arsejda Gjyli komentoi situatën politike dhe rëndësinë e rifillimit të punës së parlamentit:
“Ka shumë vendime të rëndësishme që do të merren në vazhdim.
Duket sikur vazhdimi i seancave plenare dhe rikthimi në punë i parlamentit aktivisht është më i rëndësishëm se kurrë, sidomos për sa i përket reformave dhe vendimeve që do të duhen për ngjarjet e politikës dhe drejtësisë.
Jemi në një pikë ku mosmarrëveshjet midis opozitës dhe mazhorancës duhet të zgjidhen përpara dhe tejkaluar, për të arritur vendime finale për të mirën e përbashkët,” u shpreh Gjyli.
SESIONI I RI PARLAMENTAR
Sesioni i ri parlamentar i vitit 2026 nis në një klimë të ngarkuar politike, ku palët gjenden mes diskutimeve të brendshme dhe presioneve të jashtme.
Analistja Arseda Gjyli theksoi se ky është një moment kyç për funksionimin e Parlamentit, veçanërisht në prag të vendimeve të rëndësishme si ato të Gjykatës Kushtetuese apo shqyrtimi i mandateve.
“Përveç reformave administrative dhe zgjedhore, vëmendja është te procesi i negocimit me BE-në dhe marrëdhëniet me SHBA-në. Parlamenti është përballë një momenti historik për të treguar rëndësinë e tij në vendimmarrje, ndërsa zvarritja e proceseve nuk i shërben as reformimit dhe as drejtësisë”, tha ajo.
SPAK NË OFENSIVË DHE ANKTHI BRENDA PS-së
Drejtësia e re, e përfaqësuar nga SPAK dhe GJKKO, ka kaluar në një stad të ri konsolidimi, duke tejkaluar ndryshimet e lidershipit dhe duke synuar zbatimin konkret të ligjit, jo vetëm si nocion.
Në këtë kontekst, Gjyli u shpreh se lëvizjet e brendshme në Partinë Socialiste kanë marrë vëmendje të shtuar.
“Thashethemet dhe 'teoritë konspirative' rreth një mbledhjeje të beftë të grupit parlamentar kanë nxitur diskutime për ndryshime të mundshme qeveritare apo strategji të reja politike. Mbledhja e thirrur shihet si një moment raportimi dhe rreshtimi, ndërsa PS kërkon të menaxhojë situatën mes presioneve të drejtësisë dhe nevojës për kohezion të brendshëm”, theksoi Gjyli.
MESAZHI I RAMËS PËR SOCIALISTËT
Në prag të mbledhjes së grupit parlamentar, diskutohet qasja e Partisë Socialiste ndaj sfidave aktuale, përfshirë çështjet e imunitetit të zyrtarëve të lartë dhe ngjarjeve të fundit kriminale.
Analistja Arseda Gjyli deklaroi se me një mazhorancë prej 83 mandatesh, PS ka fuqinë, por edhe përgjegjësinë e plotë për vendimet që merr.
“Kryeministri Edi Rama ka qartësuar pozicionin e tij duke u distancuar nga 'faji kolektiv' dhe duke theksuar se akuzat ndaj individëve nuk e bëjnë automatikisht fajtore të gjithë partinë. Kjo mbledhje pritet të shërbejë për unifikimin e qëndrimeve dhe dhënien e mesazhit se përgjegjësia para ligjit është personale, ndërkohë që ministrat dhe deputetët përballen me pasigurinë e ndryshimeve të mundshme”, u shpreh ajo.
RAPORTI I POLITIKËS ME DREJTËSINË
Tema më e nxehtë mbetet përballja e politikës me drejtësinë. Analistja Gjyli argumenton se çdo lëvizje e gabuar tani është nën lupën e ndërkombëtarëve dhe epoka e shfajësimeve apo tejkalimit të kompetencave ka marrë fund.
“Drejtësia po thyen nocionin e pandëshkueshmërisë, duke prekur zyrtarë që dikur konsideroheshin të paprekshëm.
Përballë kësaj, politika shpesh tenton strategjinë e zvarritjes ose negocimit, por theksohet se në drejtësi 'negocimi është rrjedhje'. Sfida e madhe mbetet nëse politika do të pranojë standardin e ri ku ligji vepron pa kompromis, apo do të tentojë të krijojë ngërçe institucionale për të mbrojtur interesat e veta”, tha Arseda Gjyli.
NDIQNI INTERVISTËN E PLOTË:
