MJEKU QË SHËRBEN NË RRËNOJA! Doktor Ahmed Muhana kthehet në Gaza pas 665 ditësh burg në Izrael

Nga OraNews Përditësimi i fundit 12 Janar 2026, 14:18

Dr. Ahmed Muhana, një nga mjekët më të rëndësishëm të urgjencës në Gaza, është rikthyer në vendlindje pas 665 ditësh në burgjet izraelite, duke gjetur spitalin dhe qytetin e tij të kthyer në rrënoja. Ai thotë se mungesa e stafit, pajisjeve dhe ilaçeve ka sjellë një krizë të re, pavarësisht armëpushimit zyrtar.

Dr. Ahmed Muhana, një nga konsulentët më të lartë të anestezisë dhe emergjencës në Gaza, u rikthye në vendlindje pas gati dy vitesh në burgjet dhe qendrat e ndalimit izraelite.

Gjatë gjithë kohës në izolim, ai thotë se është torturuar, mbajtur i lidhur me ditë të tëra, lënë pa ushqim, pa trajtim dhe ka parë persona të vdesin para syve për shkak të mungesës së kujdesit mjekësor, teksa shtoi se e vetmja gjë që e mbante gjallë ishte ideja se do të kthehej pranë familjes dhe spitalit ku kishte shërbyer prej dekadash.

Por ditën që u lirua, rruga drejt spitalit e tronditi. Aty, ai gjeti vetëm rrënojat dhe shkatërrim.

Spitali i tij ishte thuajse i boshatisur nga stafi, pajisjet mjekësore dhe barnat. Ai thotë se 75 kolegë janë vrarë, ndërsa, sipas organizatave ndërkombëtare, mbi 1 200 punonjës shëndetësorë palestinezë janë vrarë që prej tetorit 2023.

Pavarësisht armëpushimit, emergjencat nuk kanë pushuar: 77% e popullsisë, përfshirë 100 000 fëmijë, vuajnë nga mungesa e ushqimit. Në spital mbërrijnë çdo ditë fëmijë me kequshqyerje të rëndë dhe komplikacione që pak vite më parë do të trajtoheshin lehtësisht.

Shkatërrimi i qëllimshëm i sistemit shëndetësor e ka çuar Gazën drejt kolapsit. 94% e spitaleve janë të dëmtuara ose të shkatërruara dhe mungesa e pajisjeve të avancuara është kritike.

Pacientët me kancer nuk marrin trajtim, tumoret përhapen pa kontroll dhe rastet e dështimeve renale janë rritur nga mungesa e aparaturave të dializës.

Në këtë realitet të zymtë dhe me plot sfida, doktor Muhanna vazhdon punën e tij, për të shpëtuar sa më shumë jetë dhe për të qenë aty për sa më shumë njerëz.