Përmbytjet e banesave në ish-Kënetën e Durrësit, reagon banori: Kryetarja e bashkisë nuk ka ardhur fare, po na shohin si alienë
Nga OraNews Përditësimi i fundit 7 Janar 2026, 13:41
Qyteti i Durrësit është vendi më i prekur nga përmbytjet për shkak të reshjeve. Një nga zonat më kritike mbetet ish-Këneta, e cila që prej ditës së djeshme është e mbuluar nga uji.
Në një intervistë, një banor i kësaj zone tha se kryebashkiakia nuk i ka vizituar familjet e prekura nga kjo situatë e rëndë.
“Jemi përmbytur tre herë. Uji ka hyrë dje në orën 7 të mëngjesit dhe është 40 cm në nivel. Bashkia s’ka asnjë investim, ne na quajnë të ardhur si alienë se ska mundësi. Në kohën e Enverit s’të prekte këmba në ujë, sot jemi rrafsh me ujë. Ka rënë shi i madh, këtë duhet ta pranoj, por jo tre herë përmbytje. Jemi përmbytur në shtator, nëntor dhe tani. Unë s’dua lekë, dua një investim që të rri rehat në shtëpinë time. Kemi fjetur gjumë në katin e dytë, nëna fle akoma në ballkon. Gjatë kësaj kohe, të na rrojë kati i dytë, se do kishim dalë me çadra. Kryetarja e bashkisë s’na ka parë fare, ajo i merr taksat, bashkia merr taksat. Atë as në TV s’e kam parë mbrëmë, prefekti dilte, ajo hiç”, ka deklaruar një banor.
