“8 DHJETORI”/ Xhixho: Dita e Rinisë – një ditë reflektimi, por mbi të gjitha një thirrje e fortë për veprim
Nga OraNews Përditësimi i fundit 8 Dhjetor 2025, 12:36
Sot shënohet 8 Dhjetori, Dita Kombëtare e Rinisë.
E shpallur prej vitit 2009 nga Kuvendi i Shqipërisë, kjo datë përkujtohet si festë kombëtare në nderim të të gjithë studentëve të dhjetorit 1990 dhe gjithë rinisë shqiptare.
Lidhur me këtë ngjarje ka reaguar këtë të hënë edhe Zëvendëspresidentja e Partisë së Lirisë, Erisa Xhixho.
MESAZHI I XHIXHOS
Sot është Dita e Rinisë – një ditë reflektimi, por mbi të gjitha një thirrje e fortë për veprim.
Sot kujtojmë guximin e të rinjve që në 1990 vranë frikën dhe hapën rrugën e demokracisë. Por 35 vite më vonë, rinia shqiptare po largohet masivisht sepse në vend të mundësive gjen pasiguri, propagandë dhe mungesë meritokracie.
Çdo vit mijëra të rinj braktisin vendin sepse ndihen të përjashtuar nga mundësitë: mungon arsimi cilësor, mungon një treg pune i drejtë e pa klientelizëm, mungon një shtet që i sheh si pasuri dhe motor zhvillimi — jo si pengesë.
Si pedagoge e kam parë çdo ditë në sytë e tyre dëshirën për të ecur përpara, në një vend që nuk ua jep më këtë mundësi. Emigrimi si shpresa e tyre e fundit është plaga më e madhe e shoqërisë shqiptare sot. Në 12 vjet kemi humbur gati gjysmën e të rinjve!
Ky është dështimi më i rëndë i kësaj qeverie: vrasja e shpresës.
Ndaj sot më shumë se kurrë, Shqipëria ka nevojë jetike për energjinë, idealizmin dhe guximin e të rinjve për ta bërë atë një vend të mundësive për të gjithë e jo vetëm për një pakicë.
