Kovac, para ndeshjes ndaj Lille: Një sfidë e vështirë, por jemi në rrugën e duhur
Nga OraNews Përditësimi i fundit 3 Mars 2025, 17:24
Në prag të përballjes kundër Lille, trajneri i Borussia Dortmundit, Nico Kovac, foli për ndeshjen e ardhshme të Champions League kundër ekipit francez, një nga surprizat e fazës së parë të kompeticionit:
"Teknikisht, është një skuadër e shkëlqyer. Luajnë një futboll ofensiv dhe të bazuar në zotërimin e topit. Përballja me ta do të na kushtojë shumë energji dhe stabilitet.
Duhet të jemi të përgatitur për faktin se kemi përballë një kundërshtar shumë të fortë, si nesër ashtu edhe javën e ardhshme.”
Sa i përket progresit të skuadrës, ai shtoi:
"Përmirësimet janë të dukshme, por ende jemi larg nivelit që dëshirojmë. Megjithatë, po shohim evolucionin që kërkojmë dhe jemi në rrugën e duhur.
Fitorja është ilaçi më i mirë dhe duam gjithmonë më shumë."
Gjendja e Jamie Gittens dhe analiza mbi Jonathan David
Kovac gjithashtu dha një përditësim mbi formën e Jamie Gittens:
"Jamie i ka tejkaluar pritshmëritë në krahasim me lojtarët e tjerë në pjesën e parë të sezonit. Ka kaluar një periudhë në stol, por në stërvitje më ka treguar se ka rikuperuar energjinë dhe freskinë. Do të na shërbejë shumë në të ardhmen."
Sa i përket yllit të Lille, Jonathan David, Kovac deklaroi:
"Jonathan është rritur jashtëzakonisht dhe me siguri shumë shpejt do të transferohet në një klub të madh europian. Megjithatë, Lille ka edhe lojtarë të tjerë ofensivë shumë të fortë.
Ata janë një skuadër sulmuese e paparashikueshme."
Lidhur me humbjen e Lille ndaj PSG fundjavën e kaluar, ai tha:
"PSG ka një ekip të jashtëzakonshëm, është e vështirë për çdo skuadër t’i përballojë ata. Prandaj, nuk do të shpërqendrohemi nga ai rezultat.
E dimë si ta vlerësojmë atë ndeshje dhe nuk do të ndikohemi. Gjithçka do të varet edhe nga ne dhe sa fort do ta sulmojmë kundërshtarin."
