Bilanci i Spallettit: Duam Botërorin, shpresoj ta shoh Chiesan në Itali

Nga OraNews Përditësimi i fundit 22 Janar 2025, 18:22

Stafi i kombëtares italiani po përgatit playoff-et e Nations League kundër Gjermanisë, por për Luciano Spalletti-n kjo periudhë pa ndeshje është gjithashtu një mundësi për të bërë një bilanc të pjesës së parë të aventurës së tij si trajner i "azzurrëve".

Nga një Europian i luajtur dobët te një Nations League e shkëlqyer, Italia po përmirësohet: "Kur ke momente të vështira si ne gjatë Europianit, fjalët vlejnë pak.

Duhet të ndash një ide, një emocion për të rifilluar dhe për të arritur rezultate së bashku".

Nations League është një etapë e ndërmjetme drejt qëllimit përfundimtar, që është kualifikimi për Kupën e Botës 2026.

"Më ka pëlqyer angazhimi që kam parë në këtë garë," theksoi Spalletti për ‘Vivo Azzurro’.

"Kjo tregon që po punojmë me një grup lojtarësh me cilësi të jashtëzakonshme. Tani kam mundësinë të kem një grup të konsoliduar për të ardhmen dhe shumë djem të tjerë po shfaqen".

Në këtë dyvjeçar, Spalletti do të mbështetet edhe te të rinjtë që po dalin në skenë: "Nuk mund të bëjmë pa energjinë e tyre, edhe pse një lojtar me përvojë është gjithmonë i nevojshëm sepse di të zgjedhë momentet për të bërë diferencën.

Ne, ndoshta, duhet të jemi të kujdesshëm për të menaxhuar entuziazmin e tepërt, por të rinjtë janë e ardhmja jonë".

Europiani i dështuar dhe Kupa e Botës

Luciano Spalletti u rikthye te paraqitja e dobët në Europianin e zhvilluar në Gjermani: "Kur u mblodhëm për grumbullimin e parë, e diskutuam këtë.

Ndoshta kam gabuar që kërkova gjithçka dhe menjëherë. Kur mesazhi që përcjell është tepër i ngarkuar, ekziston rreziku të bllokosh mekanizmat.

Kualifikimi në Kupën e Botës është shumë i rëndësishëm për Kombëtaren tonë; nga çdo cep i botës, të gjithë presin që Italia të luajë.

Ne jemi në kërkim të identitetit tonë për futbollin tonë. Po punojmë për këtë; tani shikohet një ekip që punon për të qenë një grup i bashkuar, kompakt dhe me dëshirën për t’u bërë i fortë me një futboll të hapur, të lirë dhe total".

Në një intervistë për kanalet zyrtare të FIGC, Spalletti foli edhe për ndjesitë e tij si trajner i "azzurrëve": "Krenaria për të drejtuar këtë ekip është një emocion i përhershëm, është diçka që mbush të gjitha mendimet e mia.

Unë do të shkruaja në kartën e identitetit që jam trajneri i Kombëtares për emocionin që më shkakton.

Por ka disa gjëra që duhet të ndryshoj në mënyrën time të të menduarit, sepse mund të jenë tepër për këta djem, por duhet të jem në gjendje t'i vë në dijeni për disa aspekte që, nëse i nënvlerësojmë, rrezikojmë të na pendohen më vonë".

Lojtarët që duhet të rikuperohen

Grupi i Italisë është i bashkuar dhe i konsoliduar, por trajneri Spalletti shpreson të shohë disa situata të rëndësishme që të zhvillohen në favorin e tij.

"Pellegrini është një lojtar që Ranieri po e vendos në rregull, ai ka cilësi teknike dhe gola në këmbë.

Edhe Chiesa, shpresoj të gjejë vazhdimësi në fushë; do të isha shumë i kënaqur me një rikthim të tij në Itali, për ta ndjekur më mirë, siç bëjmë me Orsolini-n dhe Politano-n.

Gjithashtu, Zaniolo, Maldini... Cambiaso? Ai është një lojtar modern, ideal për mua, sepse përdor talentin e tij për të ndihmuar ata që kanë më pak".