Jamal Musiala dëshiron rinovimin, por me kushtet e tij, shqetëson edhe Kimmich
Nga OraNews Përditësimi i fundit 13 Janar 2025, 16:04
Marrëveshja aktuale e mesfushorit të talentuar gjerman skadon në vitin 2026 dhe, sipas informacioneve nga Sky Sports DE, Musiala dëshiron kryesisht të zgjasë kontratën e tij në vend që të largohet dhe të kërkojë një aventurë me një skuadër tjetër, ndoshta në një kampionat tjetër jashtë Gjermanisë, por ende në Europë.
Çështje për t'u zgjidhur
Kur do të vijë rinovimi? Negociatat mes palëve kanë kohë që janë hapur, por përfaqësuesit e Musialas po shqyrtojnë mundësinë e përfshirjes së një klauzole lirimi në kontratën e re, në varësi të kohëzgjatjes së marrëveshjes (deri në vitin 2029 ose 2030). Sipas raportimeve, klauzola mund të jetë rreth 175 milionë euro.
Një tjetër pengesë është paga e garantuar për lojtarin e lindur në vitin 2003: agjentët e tij janë të hapur për diskutime, por duke përfshirë bonuse dhe shpërblime të tjera, paga e tij vjetore pritet të arrijë rreth 25 milionë euro.
Pas çështjes së Musialas, vjen ajo e Joshua Kimmich. Mesfushori gjerman 29-vjeçar, një simbol i Bayern-it për dhjetë vite me radhë, rrezikon të largohet si lojtar i lirë në fund të sezonit nëse nuk rinovon kontratën.
Aktualisht, Kimmich nuk është i gatshëm të pranojë një marrëveshje me pagë më të ulët sesa paga aktuale.
Presidenti i Bayern-it, Herbert Hainer, gjatë asamblesë së përgjithshme të klubit bavarez deklaroi:
"Ne jemi një klub që vendos standardet, kemi qenë të tillë me Beckenbauer, Hoeness, Rummenigge, Lahm, Schweinsteiger, Muller dhe Neuer.
Edhe Jamal (Musiala), Jo (Kimmich) dhe Phonzy (Davies) duhet të përfshihen këtu dhe të vendosin standardet për gjeneratat e ardhshme, në fushë dhe jashtë saj."
