EMRI+VIDEO/ Në kërkim ndërkombëtar për trafik droge dhe vjedhje, arrestohet 41-vjeçari në Laç, pritet ekstradimi drejt Italisë
Nga OraNews Përditësimi i fundit 17 Tetor 2024, 09:40
Policia e Shtetit thekson se Drejtoria e Forcës së Posaçme Operacionale në Departamentin e Policisë Kriminale në DPPSh ka finalizuar një tjetër operacion për kapjen e shtetasve të shpallur në kërkim ndërkombëtar.
"Gjatë operacionit të koduar “Operacionalja 20”, u kap në Laç dhe u arrestua me qëllim ekstradimin, një 41-vjeçar (shtetas shqiptar) i kërkuar nga autoritetet italiane.
Ky shtetas akuzohet nga Gjykata e Firences, si pjesëtar i një organizate kriminale për trafikim të narkotikëve dhe për vjedhje dhe dhunë.
Në bazë të informacioneve të siguruara nga inteligjenca policore, për vendndodhjen e një shtetasi të shpallur në kërkim ndërkombëtar, Drejtoria e Forcës së Posaçme Operacionale organizoi operacionin policor të koduar “Operacionalja 20”, gjatë të cilit u kap në fshatin Gjormë, Laç, dhe u vu në pranga me qëllim ekstradimin, shtetasi Armand Mera, 41 vjeç, banues në fshatin Gjormë.
Ky shtetas ishte shpallur në kërkim ndërkombëtar, pasi Gjykata e Apelit e Firences i ka caktuar masën e sigurisë “Arrest në burg”, për veprat penale “Organizata kriminale”, “Trafikimi i narkotikëve” dhe “Vjedhja me dhunë”, të parashikuara nga Kodi Penal i Italisë.
Vijon bashkëpunimi ndërmjet Interpol Tiranës dhe Interpol Romës, për ta ekstraduar këtë shtetas, në Itali", njofton Policia e Shtetit.
