EMRI/ Lëvizte me armë në makinë, arrestohet në flagrancë 43-vjeçari në Tiranë
Nga OraNews Përditësimi i fundit 28 Prill 2024, 10:28
Një 43-vjeçar është arrestuar nga policia pasi qarkullonte me automjet i armatosur.
43-vjeçari banues në Shkodër ishte i dënuar më parë për vepra penale kundër jetës dhe personit.
Në prangat e policisë përfundoi shtetasi Blerim Gjeta.
Njoftimi i policisë:
Vorë/Qarkullonte me automjet, i armatosur, arrestohet në flagrancë 43-vjeçari.
Seksioni i Operacioneve Speciale në DVP Tiranë, në bashkëpunim me Komisariatin e Policisë Nr. 7, në zbatim të masave të planit operacional "Sundimi i ligjit", bazuar dhe në informacionet e siguruara nga inteligjenca policore, finalizoi operacionin e koduar “Van”.
Gjatë operacionit u arrestua në flagrancë shtetasi B. Gj., 43-vjeç, banues në Shkodër, i dënuar më parë për vepra penale kundër jetës dhe personit, që qarkullonte me automjet i armatosur.
Në cilësinë e provës materiale u sekuestrua arma e zjarrit pistoletë, me krëhër e municion luftarak, që 43-vjeçari posedonte.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
