Zjarri në Elbasan, Peleshi: Efektivë të FA i bashkohen forcave zjarrfikësve
Nga OraNews Përditësimi i fundit 7 Nëntor 2023, 11:02
Ministri i Mbrojtjes Niko Peleshi njofton se efektivët e Forcave të Armatosura u janë bashkuar forcave zjarrfikësve të cilat po luftojnë me zjarrin në Elbsan, në vendgrumbullimin e skrapit, në uzinën e kompanisë “Kurum”.
Përmes një reagimi në rrjetet sociale, Ministri Peleshi, sqaron se një pjesë e skrapit është zhvendosur, duke vënë nën kontroll situatën.
“Efektivë të Forcave të Armatosura së bashku me automjete zjarrfikëse me shkumë u janë bashkuar shërbimeve zjarrfikëse të bashkive Elbasan, Gramsh, Peqin dhe Cërrik për të shuar zjarrin në vendgrumbullimin e skrapit, në uzinën e kompanisë “Kurum”, në territorin e ish-Kombinatit Metalurgjik. Me mjete të rënda është zhvendosur një pjesë e skrapit, duke vënë nën kontroll situatën e krijuar”, bën të ditur Peleshi.
Ditën e hënë rreth orës 11:15′, dyshohet se nga një shkëndijë e krijuar si pasojë e fërkimit të mbetjeve metalike, ka rënë zjarr në një pikë për grumbullimin e skrapit, në zonën e ish-kombinatit metalurgjik, në Bradashesh.
Sipas njoftimit paraprakë të Policisë, nuk ka shtetas të dëmtuar nga flakët. Grupi hetimor vijon të punojë për të dokumentuar ligjërisht shkakun e zjarrit.
