Rrajat kërkohen për dhunën, dyshohet se nuk kanë dalë nga vendi, prokuroria verifikon sistemin TIMS
Nga OraNews Përditësimi i fundit 12 Korrik 2023, 14:24
Kur po kalon një javë nga dhuna me shkopinj bejsbolli në borizan të Krujës, 6 anëtarët e familjes Rraja janë ende në kërkim. Burimet kanë bërë të ditur se dyshohet që ata të mos e kenë lënë territorin shqiptar, të paktën sipas verifikimeve në sistemin TIMS.
Katër ditë pasi Rrahman Rraja ka lënë mandatin e deputetit, KQZ ka vendosur zëvendësimin e tij duke plotësuar vakancë.
Rraja u largua nga parlamenti pas publikimit të videos ku djali i tij, vëllai dhe familjarë të tjerë goditën me shkopinj bejsbolli e mjete të tjera të forta Jashar dhe Bilbil Memën.
Madje pamjet e dhunës së egër të publikuara në media u filmuan nga vetë familjarët e deputetit.
Për këtë vetëm tre persona janë në qeli dhe një është në arrest në shtëpi.
6 persona të tjerë përfshirë dhe djalin e deputetit janë ende në kërkim. Burimet kanë bërë të ditur se të gjitha pikat e kalimit të kufirit janë njoftuar për të ndaluar të akuzuarit nëse do të tentojnë kalimin.
Po ashtu mësohet se nga verifikimi i sistemit TIMS ata nuk kanë dalë nga Shqipëria.
Dyshimet janë se fshihen te të afërm apo miq të tyre. një tjetër dyshim është se pas dhunës janë fshirë edhe pamjet e filmuar në lokalin ku ata rrahën dy personat e tjerë madje është edhe riformatuar sistemi.
Konkluzioni është arritur pas këqyrjes së të gjithë materialit.
