Interi po punon për sulmin e së ardhmes, qëllimi është të mos preket “Lu-La”

Nga OraNews Përditësimi i fundit 12 Qershor 2023, 09:10

Me humbjen shumë të dhimbshme të pësuar në finalen e Ligës së Kampionëve ndaj Manchester City, ka ardhur koha që Interi t’i përqendrojë forcat në sezonin e ardhshëm.

Synimi padyshim do të jetë të qëndrohet në një nivel të lartë dhe për ta bërë këtë do të duhet të mbahen të gjithë lojtarët më të mirë. Shtylla kurrizore e ekipit është tashmë e përcaktuar mirë, por ka një repart në veçanti që mund të kërkojë më shumë punë se të tjerët në merkato: sulmi.

Për momentin, i vetmi i sigurt për të qëndruar është Lautaro Martinez. Qendërsulmuesi argjentinas ka admirues në të gjithë Evropën, përfshirë Real Madridin, por sipas asaj që raporton “Gazzetta dello Sport”, në Milano nuk presin të marrin oferta që mund të rrezikojnë të ardhmen e tij në hijen e Duomo-s.

Diskursi në lidhje me Romelu Lukakun është padyshim i ndryshëm. Sulmuesi belg është i lidhur kontraktualisht me Chelsea dhe së shpejti do të duhet të kthehet në bazë, por Interi dëshiron fuqimisht të vazhdojë të bazohet tek ai. Pavarësisht paraqitjes së keqe në finalen e Champions League, askush nuk ka dyshime për cilësitë e tij brenda klubit dhe për këtë arsye së shpejti do të ketë një samit me Chelsea për të kuptuar se cilat janë planet e klubit londinez.

Interi synon një rinovim të huazimit me shifra më të ulëta se ato aktuale, por gjithashtu është gati të zgjerojë diskutimin, duke e përfshirë ndoshta në kuadrin e negociatave të tjera të mundshme, që mund të përfshijnë Onana, Dumfries, Chalobah dhe madje edhe Koulibaly. E vetmja gjë e sigurt për momentin është se Interi nuk dëshiron ta privojë veten nga Lukaku, nuk dëshiron ta prishë tandemin “Lu-La”.

Po ashtu pritet të shkruhet e ardhmja e Edin Dzeko. Sulmuesi boshnjak do të shohë që kontrata e tij të përfundojë brenda dy javësh dhe do të duhet të gjendet akordi i duhur për rinovim. Disa muaj më parë u arrit një marrëveshje për një vit tjetër me 5 milionë euro neto, por ndërkohë kanë mbërritur oferta nga klube të tjera që i ofrojnë kontrata 2-vjeçare. As Interi nuk duket më aq i bindur që t’i garantojë një pagë kaq të rëndësishme.

Zikaltrit nuk do të donin të shkonin përtej një kontrate vjetore me vlerë maksimumi 4 milionë dhe në këtë moment topi i kalon Dzekos, i cili do të duhet të vendosë nëse oferta është e drejtë apo jo. Në rast lamtumire, mes atyre që mund ta zëvendësojnë është Gianluca Scamacca, një sulmues i lidhur së fundi me Milanin dhe Romën, që mund ta huazojë edhe West Ham.

Nga ana tjetër, ai që duhet t’i përshëndesë zikaltrit sigurisht është Correa. Aventura e tij me Interin nuk shkoi ashtu siç pritej, pavarësisht një “sponsori” të rëndësishëm si Simone Inzaghi. Klubi i Zhang po kërkon tregun evropian për të gjetur zëvendësuesin e duhur.