Elly Ssclein e para grua që do të drejtojë Partinë Demorkatike Italiane

Nga Alba Kepi Përditësimi i fundit 27 Shkurt 2023, 09:05

Pas një kryeministre grua, Italia ka sot dhe në krahun opozitar një lider grua mjaft të re në moshë, 38 vjece.

Janë zhvilluar këtë të djelë primaret e Partisë Demokratike Italiane, forca politike më e madhe e së majtës italiane që para qeverisë Meloni ka qeverisur vendin për më shumë se një dekadë.

Fituese e tyre me mbi 53.8% të votave u shpall demokratja Elly Schlein, e cila mundi kandidatin tjetër Stefano Bonaccini.

Pas humbjes në zgjedhjet politike të 25 shtatorit 2022, kreu i Partisë Demokratike, ish kryeministri Enrico Letta ka dhënë dorëheqjen duke i hapur rrugën kështu nisjes së procesit të primareve brenda kësaj force politike.

Më 4 dhjetor 2022, Elly Schlein deklaroi kandidaturën e saj.

Liderja e re opozitare ka një karrierë të pasur politike.

Më 2008 merr pjesë si vullnetare në mbështetje të fushatës elektorale të Presidentit Barac Obama në SHBA e më 2012 bëhet pjesë e mbështetësve të tij në rizgjedhjen e votës presidenciale.

Më 2011 themeloi në Bologna lëvizjen studentore mbi sensibilizimin e politikës në cështjet e emigracionit duke krijuar dhe revistën ProMiGrè,.

Më maj të 2014 zgjidhet europarlamentare për Partinë Demokratike e një vit më vonë pas marrjes së drejtimit të kësaj Partie nga ish Kryeministri Mattteo Renzi, deklaron largimin e saj duke akuzuar se ai ka braktisur idealet e së majtës me një linjë politike të qëndrës së djathtë.

Më 11 shkurt 2020 zgjidhet zvendës guvernatore e rajonit të Emilia Romagna, ku kandidon në një listë forcash aleate të së majtës italiane e merr numrin më të madh në historinë e këtij rajoni në preferencën e votave personale si kandidate.

Në zgjedhjet politike të 25 shtatorit 2022 ishte e para në listën e Partisë Demokratike në rajonin e Emilia Romagnas e është deputete e kësaj legjislature të re.

Primaret e 26 shkurtit 2023 e shpallin Elly Schlein dhe lider të re të Partisë Demokratike.

"Populli demokratik është gjallë, e është gati të ringrihet me një linëj të qartë", janë fjalët e saj menjëherë pas të dhënave të qarta të votës së primareve ku morën pjesë rreth 1 milionë italianë.