Cilët janë faktorët që e sollën rritjen e çmimeve të bulmetit? Autoriteti i Konkurrencës po heton që prej 8 shkurtit

Nga OraNews Përditësimi i fundit 16 Shkurt 2023, 08:21

Autoriteti i Konkurrencës ka nisur hetimin e shkaqeve që çuan në shtrenjtimin e produkteve të bulmetit në vend që prej 8 shkurtit.

Lajmi u bë me dije nga Dafina Hysa, Përfaqësuese e Qendrës “Konsumatori Shqiptar” në një intervistë për emisionin “Ditë e Re” në RTV Ora.

Pjesë nga biseda në studio

A ekziston mundësia e nje marrëveshje të fshehtë mes prodhuesve?

Dafina Hysa, Përfaqësuese e Qendrës “Konsumatori Shqiptar”: Është një mundësi që nuk përjashtohet. Por kërkon hetim të thelluar e professional. Siç është bërë me dije, ky treg është tashmë nën monitorim nga ana e Autoritetit të Konkurrencës.

Por ndërkohë ne i referohemi deklaratave zyrtare nga të dyja palët…

Sipas drejtuesve të shoqatave të fermerëve, edhe pse këta të fundit kanë një rritje të kostove të mbarështimit deri në 50% për vitin që lamë pas, sërish nuk kanë reflektuar një shtrenjtim të çmimit të qumështit në këto nivele.

Sa i përket dyshimeve në lidhje me një marrëveshje të fshehtë mes prodhuesve, ka pasur një reagim edhe nga ana e Shoqatës së Industrisë të Përpunimit të Qumështit, e cila ka kundërshtuar në mënyrë kategorike ekzistencën e një marrëveshjeje për çmimet, duke konfirmuar se vetëm 1 kompani ka lajmëruar shtrenjtim të nënprodukteve, sidomos nga qumështi i deleve dhe dhive.

Nëse ka apo jo marrëveshje dhe fiksim të çmimeve do përcaktohet nga Autoriteti i Konkurrencës.

Nisja e monitorimit të tregjeve të caktuara, kur ka dyshime dhe informacione për abuzime, është një detyrim i Autoritetit, por mbi të gjitha është e rëndësishme të ketë një vendimmarrje në një kohë sa më të afërt.

Konstatohet se nga tregjet e marra ne monitorim me heret, vendimi i Autoritetit të Konkurrencës ka ardhur në kapërcim të vitit, apo edhe 2 vite nga nisja e hetimeve siç ishte rasti me kompanitë e miellit.