Vdes 30 vjeçarja pas lindjes te Koço Gliozheni, materniteti: Erdhi pas disa ditësh me dobësi trupore
Nga Anxhela Celibashi Përditësimi i fundit 1 Shkurt 2023, 13:21
Një 30 vjeçare ka humbur jetën sot në maternitetin Koço Gliozheni në Tiranë disa ditë pasi kishte sjellë në jetë foshnjen e saj.
Në një deklaratë spitali tha se e reja gjatë shtrimit nuk ka patur patologji shoqëruese dhe lindja natyrale ka shkuar mirë.
"SUOGJ “Koco Gliozheni” I shpreh ngushëllimet familjarëve të së ndjerës me inicialet M.V., e cila ka ndërruar jetë disa ditë pas lindjes së foshnjës.
30-vjecarja është shtruar në spitalin tonë më datë 28 janar dhe nuk ka referuar asnjë patologji shoqëruese.
Lindja natyrale ka shkuar mirë, duke sjellë në jetë një djalë të shëndetshëm. Pas 48 orësh qëndrimi në spital, ku ka marrë shërbimin e nevojshëm, nëna ka dalë nga spitali me dëshirën e saj, në gjendje shëndetësore të stabilizuar.
Disa ditë pas lindjes nëna e re është paraqitur në spital me dobësi trupore dhe menjëherë, pacientja është shtruar në repartin e terapisë intensive, ku është trajtuar konform të gjitha protokolleve mjekësore.
Pavarësisht përpjekjeve të stafit mjekësor, gjendja e pacientes është rënduar në mënyrë të shpejtë, duke ndërruar jetë."
