KFOR konfirmon: Po planifikohen takime mes të gjitha palëve për tensionet në veri. Të shmanget retorika e dhunës
Nga OraNews Përditësimi i fundit 26 Dhjetor 2022, 12:33
Misioni i trupave paqeruajtëse i NATO-s në Kosovë, KFOR, njofton se janë planifikuar takime ndërmjet të gjitha palëve të përfshira në situatën e tensionuar në veri të Kosovës.
Ndërsa thekson se po e heton incidentin e së dielës në Zubin Potok, KFOR-i nuk ka bërë të ditur se për cilat palë bëhet fjalë konkretisht që do të ulen në bisedime.
Në njoftimin e tij, KFOR-i thotë se po punohet për zbardhjen e rrethanave të sulmit në afërsi të patrullës së tij, ndërsa shton se është e rëndësishme që të shmangen veprimet që mund të shkaktojnë tensione dhe të përshkallëzojnë situatën.
“KFOR-i po heton një incident indirekt zjarri më 25 dhjetor në afërsi të patrullës së KFOR-it të NATO-s. Incidenti me persona të panjohur të armatosur në zonën e Zubin Potokut. Nuk ka të lënduar apo dëme materiale dhe po punohet për zbardhjen e të gjitha fakteve. Duke qenë se janë planifikuar takime ndërmjet të gjitha palëve, është e rëndësishme që të gjithë të përfshirët të shmangin çdo retorikë apo veprim që mund të shkaktojë tensione dhe të përshkallëzojë situatën”, thuhet në deklaratë.
Më tej, KFOR-i bën me dije se palëve u është kërkuar që të ndihmojnë në sigurimin dhe lirinë e lëvizjes në Kosovë dhe të parandalojnë narrativat mashtruese që ndikojnë në procesin e dialogut.
“Komandanti i misionit të KFOR-it të udhëhequr nga NATO vazhdon të mbështesë dialogun për të gjetur një marrëveshje për të zbutur tensionet në veri të Kosovës. Ai mbetet në kontakt të ngushtë me të gjithë ata që janë përfshirë në këtë proces. Ne mbetemi vigjilentë dhe plotësisht të aftë për të përmbushur mandatin tonë sipas Rezolutës 1244 të vitit 1999 për të gjitha komunitetet në Kosovë. Zgjidhjet duhet të kërkohen përmes dialogut”, thuhet në njoftim.
Gjatë mbrëmjes të së dielës, afër një patrulle të KFOR-it ka pasur të shtëna, nga të cilat nuk ka pasur të lënduar dhe as dëme materiale.
“Në këtë moment mund të konfirmoj se para disa orësh një patrullë e KFOR-it, derisa ishte në detyrë në rrethinën e Zubin Potokut, ka dëgjuar dhe parë disa të shtëna afër tij. Të lënduar nuk ka dhe nuk ka dëme materiale. Tani po i kontrollojmë faktet dhe do t'ju përditësojmë”, thuhet në përgjigje.
