BE-ja financon marrëveshjen e kontrollit të kufirit në Egjipt
Nga OraNews Përditësimi i fundit 30 Tetor 2022, 19:20
Bashkimi Evropian nënshkroi një marrëveshje me Egjiptin të dielën për fazën e parë të një programi të menaxhimit të kufijve prej 80 milionë euro, thuhet në një deklaratë nga delegacioni i BE-së në Kajro, në një kohë kur migrimi egjiptian në Evropë është në rritje.
Projekti synon të ndihmojë rojet bregdetare dhe kufitare të Egjiptit të zvogëlojnë migrimin e parregullt dhe trafikimin e qenieve njerëzore përgjatë kufirit të tij, dhe parashikon prokurimin e pajisjeve të mbikëqyrjes si anijet e kërkimit dhe shpëtimit, kamerat termike dhe sistemet e pozicionimit satelitor, sipas një dokumenti të Komisionit të BE-së të publikuar këtë muaj.
Që nga fundi i vitit 2016, migrimi i parregullt në Evropë nga bregu verior i Egjiptit është ngadalësuar ndjeshëm. Megjithatë, migrimi i egjiptianëve përtej kufirit të gjatë të shkretëtirës së Egjiptit me Libinë dhe nga bregu i Mesdheut të Libisë në Evropë ka qenë në rritje, thonë diplomatët.
Nga 1 janari deri më 28 tetor të këtij viti, 16,413 emigrantë që mbërritën me anije në Itali deklaruan se ishin egjiptianë, duke i bërë ata grupin e dytë më të madh pas tunizianëve, sipas të dhënave të publikuara nga ministria e brendshme e Italisë.
Në vitin 2021, më shumë se 26,500 egjiptianë u ndaluan në kufirin libian, sipas dokumentit të Komisionit të BE-së.
Dokumenti i Komisionit të BE thotë se deri më sot, Egjipti e ka trajtuar migrimin e parregullt "kryesisht nga perspektiva e sigurisë, ndonjëherë në kurriz të dimensioneve të tjera të menaxhimit të migracionit, duke përfshirë mbrojtjen e bazuar në të drejtat e migrantëve, refugjatëve dhe azilkërkuesve"./Reuters/
