Deputetët mundohen të frenojnë rikthimin e ish-kryeministrit Boris Johnson
Nga Amado Çela Përditësimi i fundit 22 Tetor 2022, 15:31
Boris Johnson duket se po mendon për një rikthim në arenën politike britanike.
Armiqtë e tij brenda konservatorëve po bëjnë çmos që ta ndalojnë.
Ish-kryeministri britanik i shkarkuar vetëm tre muaj më parë pas një largimi masiv të stafit të tij qeverisës po synon që t’i rikthehet garës për t’u bërë lider i konservatorëve pas dorëheqjes të Liz Truss.
Me frikën e dështimit në zgjedhjet e ardhshme, një grup konservatorësh ende besojnë se Johnson është më i miri për t'i ndihmuar ata të mbajnë vendet e tyre në zgjedhjet e vitit 2024.
Por shumë figura të larta konservatore kanë frikë se rikthimi te
Johnson, tani një figurë jashtëzakonisht përçarëse, mund ta ndajë përgjithmonë partinë.
Dhe aktualisht po kryhet një punë e koordinuar për të ndaluar iniciativën e Johnson.
Deputetët e tij besnikë dikur, tani shprehen se partia do të copëtohet nëse Borisi vjen sërish në pushtet dhe kërcënojnë me dorëheqje.
Megjithatë edhe pa lobuar, shanset për rikthimin e ish-kryeministrit janë të pakta me rregullat e reja të vendosura për të zëvendësuar Truss.
Zyrtarët më të lartë të Partisë Konservatore shpalosën një plan për të penguar ish-kryeministrin.
Kushdo që dëshiron të marrë pjesë në garë tashmë ka nevojë për mbështetjen e të paktën 100 deputetëve.
Pragu është jashtëzakonisht i lartë për Boris Johnson për të kaluar kolegët e tij kundërshtarë që gjithashtu garojnë për kreun e partisë.
