Imazhet satelitore sot të urës së hedhur në erë në Krime, rifillon trafiku
Nga OraNews Përditësimi i fundit 13 Tetor 2022, 09:03
Imazhet e reja satelitore nga Maxar Technologies të marra të mërkurën tregojnë automjete që kalojnë urën Kerç në Krime vetëm disa ditë pasi një shpërthim vdekjeprurës dëmtoi të vetmen lidhje rrugore dhe hekurudhore midis Rusisë dhe gadishullit ukrainas të aneksuar nga Moska në 2014.
Shpërthimi i së shtunës, i cili vrau të paktën tre persona, ishte një goditje e madhe për Moskën dhe Kremlini është përgjigjur me sulme vdekjeprurëse kundër infrastrukturës civile të Ukrainës gjatë tre ditëve të fundit.
Imazhet tregojnë se trafiku i kufizuar i makinave dhe hekurudhave ka rifilluar në urë pas shpërthimit ndërsa riparimet janë duke vazhduar.
Fotot tregojnë gjithashtu radhë të gjata me kamionë mallrash që presin të transportohen në Krime nga Rusia.
Megjithëse trafiku i makinave në urë ka rifilluar, automjete më të mëdha si kamionë, furgonë dhe autobusë po udhëtojnë tani me traget përtej ngushticës së Kerçit.
Autoritetet ruse kanë arrestuar tetë persona në lidhje me sulmin në urë, njoftoi media shtetërore të mërkurën.
Ura e Krimesë është një arterie kritike për furnizimin e gadishullit me nevojat e tij ditore dhe me furnizimet për ushtrinë ruse. Gjatë muajve të fundit, dhjetëra autokolona ushtarake ruse kanë përdorur urën, duke transportuar automjete, forca të blinduara dhe karburant.
Kievi nuk ka marrë përgjegjësinë për shpërthimin në urë.
