OKB i kërkon Rusisë lirimin e shefit të centralit të Zaporizhjës, Ihor Murashov
Nga OraNews Përditësimi i fundit 2 Tetor 2022, 18:40
Organizata e Kombeve të bashkuara përmes Agjencisë së saj për Mbikëqyrje Bërthamore i ka bërë thirrje Kremlinit që të lirojë drejtorin e centralit më të madh bërthamor të Ukrainës, i cili raportohet se është rrëmbyer nga patrulla e ushtrisë ruse.
Një ditë pasi drejtori i centralit më të madh bërthamor të Ukrainës, Ihor Murashov u ndalua teksa po udhëtonte nga centrali i Zaporizhjës për në qytetin Enerhodar, drejtori i Agjencisë Ndërkombëtare për Energji Bërthamorepranë Oganizatës së Kombeve të Bashkuara kërkon lirimin e tij.
OKB tha se shpreson që “Murashov do të kthehet te familja e tij në mënyrë të sigurt dhe të shpejtë në mënyrë që ai të vazhdojë punën e tij të rëndësishme në central”.
Enehoatom, kompania shtetërore ukrainase që mbikëqyr centralin e Zaporizhjës njoftoi se Murashov “u nxor nga vetura, iu mbyllën sytë dhe më pas u dërgua në drejtim të panjohur”.
Ndalimi i Murashovit “ka një ndikim të madh” në sigurinë e tij dhe sigurinë bërthamore tha agjencia.
Është e paqartë pse Murashov është ndaluar, ndërsa autoritetet ruse nuk kanë dhënë asnjë deklaratë lidhur me këtë çështje.
Centrali i Zaporizhjës dhe zona përreth kontrollohen nga forcat ruse që nga marsi, ndërkaq stafi ukrainas vazhdon të operojë me këtë uzinë.
Reaktori i fundit i centralit të Zaporizhjës u fik në shtator për shkak të granatimeve pranë uzinës bërthamore.
Kievi dhe Agjencia Ndërkombëtare për Energji Bërthamore kanë paralajmëruar se mund të shkaktohet katastrofë mjedisore si pasojë e luftimeve pranë centralit.
Rusia ka hedhur poshtë çdo thirrje për të krijuar një zonë të çmilitarizuar përreth centralit të Zaporizhjës.
