Konflikt tjetër në Azinë Qendrore / Kirgistani dhe Taxhikistani “luftë” për kufirin, 100 të vdekur

Nga Ora News Përditësimi i fundit 19 Shtator 2022, 10:13

Të dielën një konflikt për vijën kufitare mes Taxhikistanit dhe Kirgistanit la 100 të vdekur mes palëve. Situata është e tensionuar dhe mosmarrëveshjet për kufirin janë të vjetra. Rusët kanë ndërhyrë menjëherë duke kërkuar armëpushim mes dy ish-republikave sovjetike. Në të njëjtën valë kanë qënë edhe amerikanët. 

Rusët dhe amerikanët janë në një valë sa i përket uljes së gjakrave në konfliktin mes dy republikave në Azinë Qëndrore, Kirgistanit dhe Taxhikistanit.

Konflikti në kufi mes dy vendeve përshkallëzoi të dielën në përdorimin e armëve, ku mbetën të vrarë rreth 100 vetë.

Ka reaguar menjëherë aleati i të dy vendeve, Rusia, duke kërkuar ulje të gjakrave dhe armëpushim mes dy vendeve.

KETU LAJMET MINUTE PAS MINUTE

Ish republikat sovjetike përshkallëzuan konfliktin në përdorim armësh për shkak të një mosmarrëveshjeje kufitare. Dy republikat aziatikoqendrore akuzojnë njëra – tjetrën për përdorimin e tankeve, mortajave, artilerisë me raketa dhe dronëve sulmues për të sulmuar vendbanimet kufitare.

Koflikti mes dy vendeve është i hershëm dhe të dyja vendet kundërshtojnë përcaktimin kufitar mes tyre. Ka pasur përplasje me armë edhe më herët, e fundit në prill të viti 2021, ku mbetën mbi 50 të vdekur.

Ekspertët e marrëdhënieve ndërkombëtare sqarojnë se çështjet kufitare mes ish-republikave sovjetike rrjedhin kryesisht nga epoka komuniste, kur Moska u përpoq të ndërtonte hapësira shtetërore për grupe të ndryshme etinike në rajon.

Presidenti rus Vladimir Putin foli me telefon me homologët repsektivë duke kërkuar armëpushim, njoftoi të dielën Kremlini. Putin u kërkoi palëve të parandalojnë përshkallëzimin e mëtejshëm dhe të marrin masa për të zgjidhur situatën me mjete paqësore, politike dhe diplomatike sa më shpejt të jetë e mundur.

Edhe amerikanët kanë pasur të njëjtin reagim, duke u druajtur për një përshkallëzim më të gjerë të luftës, dhe kanë inkurajuar palët që ta zgjidhin situatën me mjete politike dhe diplomatike.