Kosova ngelet si Bjellorusia, Qeveria rrëzoi projektligjin e PDK-së për rregullimin e çmimit të ilaçeve
Nga Amado Çela Përditësimi i fundit 29 Korrik 2022, 17:51
Maxhoranca në Kosovë ka vendosur të radhitet krah Bjellorusisë. Të dy shtetet janë të vetmet në kontinentin evropian që nuk kanë rregullator për ilaçet, pasi Vetëvendosja hodhi poshtë projektligjin e PDK-së të premten.
Deputetët e maxhorancës në Kosovë kanë rrëzuar projektligjin e hartuar nga partia më e madhe opozitare në vend PDK-ja lidhur rregullimin e çmimeve të ilaçeve dhe produkteve medicinave.
Vetëm 19 deputetë kanë votuar pro, 42 kundër dhe dy kanë abstenuar, në mesin e tyre edhe kryetari i Kuvendit, Glauk Konjufca.
Aktualisht, çmimin e produkteve farmaceutike në Kosovë e caktojnë vetë farmacitë dhe ende nuk ka një mekanizëm për unifikimin e tregut.
Në memorandumin shpjegues të projektligjit, i cili nuk u miratua, thuhet se në mungesë të rregullimit të çmimit të ilaçeve, buxheti i shtetit dhe qytetarët, për vite me radhë, janë dëmtuar duke paguar produkte më shtrenjtë se vlera e tyre.
Projektligjin e mbështetën edhe dy partitë e tjera opozitare, Lidhja Demokratike e Kosovës dhe Aleanca për Ardhmërinë e Kosovës.
Kreu i Grupit Parlamentar të AAK-së, Besnik Tahiri, kërcënoi edhe me bllokadë në sesionin e ardhshëm parlamentar nëse Vetëvendosja do të votonte kundër projektligjit.
Argumenti i qeverisë ishte se ata e kishin planifikuar që ta formonin rregullatorin e çmimeve të ilaçeve për në shtator.
Rregullimi i çmimit të barnave bëhet në të gjitha vendet e Ballkanit Perëndimor dhe në Bashkimin Evropian, ku Kosova synon të anëtarësohet.
Aktualisht, vetëm Kosova dhe Bjellorusia në kontinentin evropian nuk kanë legjislacion për qëllim të tillë.
