Alarm në Evropë: Franca, Spanja dhe Portugalia po digjen nga zjarret
Nga Ora News Përditësimi i fundit 17 Korrik 2022, 10:15
Autoritetet në Evropën Perëndimore janë vënë në gatishmëri pasi po përballen me një valë të paprecedentë të të nxehtit dhe, në të njëjtën kohë, një "bum" zjarresh shkatërruese .
Mes vapës, zjarret në pyjet e Francës jugperëndimore dhe Spanjës ishin aktiv të shtunën, duke detyruar mijëra njerëz të largohen nga shtëpitë e tyre.
Rreth 14 mijë persona, banorë të përhershëm dhe pushues, janë prekur nga evakuimi në rajonin Gironde të Francës. Më shumë se 1200 zjarrfikës po luftojnë për të vënë nën kontroll flakët.
"Ne kemi një zjarr që do të vazhdojë të përhapet derisa të stabilizohet," tha Vincent Ferrier, zëvendësguvernator i Langone, në një konferencë shtypi.
Disa zjarre pyjore kanë shpërthyer në Francë, Spanjë dhe Portugali ditët e fundit. Në Gironde sot vlerësohet se rreth 100,000 hektarë tokë janë djegur.
38 nga 96 departamentet e Francës janë vendosur gjithashtu në alarm "portokalli" për shkak të valës së të nxehtit që pritet të arrijë kulmin të hënën, me temperatura që kalojnë 40 gradë.
Në Spanjë, zjarrfikësit po luftojnë në kushte ekstreme, pasi termometri tregoi deri në 45.7 gradë Celsius sot.
Sipas të dhënave nga Instituti Shëndetësor Carlos III, vala e të nxehtit njëjavore ka shkaktuar 360 vdekje.
Më shumë se 3,000 njerëz u larguan nga shtëpitë e tyre në qytetin Michas, në provincën e Malaga, i cili është i popullarizuar nga turistët e Evropës veriore. Shumë u strehuan në një qendër sportive lokale.
“Makinat e policisë po dilnin lart e poshtë rrugës me sirena që po binin dhe u thanë të gjithëve të largoheshin. Thjesht largohu. Asnjë udhëzim se ku të shkosh”, tha një pensionist britanik, John Pretty, 83 vjeç.
"Është e frikshme... sepse nuk e dini se çfarë po ndodh," tha banori belg Jean-Marie Vandelanot, 68 vjeç.
Tymi i zi i dendur po ngrihet edhe pranë Casas de Miravete, në Extremadura, ndërkohë që helikopterët hedhin vazhdimisht ujë. Dy fshatra u evakuuan dhe zjarri kërcënon Parkun Kombëtar Montfrague.
Zjarret e tjera shpërthyen gjithashtu në Castile dhe León dhe më tej në veri në Galicia.
Situata në Portugali është pak më e mirë sot për sa i përket fronteve të zjarrit, pasi temperatura ka rënë paksa. Në ditët e mëparshme ka arritur edhe 40 gradë.
“Kemi pasur zjarre të mëdha dhe nuk duam që ato të rindizen. Ne do të jemi në vëzhgim këtë fundjavë”, tha komandanti i agjencisë së Mbrojtjes Civile Andre Fernandez.
Sipas Ministrisë së Shëndetësisë të Portugalisë, 238 persona kanë vdekur për shkak të të nxehtit nga 7 deri më 13 korrik. Shumica ishin të moshuar me sëmundje bashkeshoqeruese.
Në anën e kundërt të Mesdheut, në Marok, deri në orët e vona të mbrëmjes së djeshme, me ndihmën e avionëve zjarrfikës, shumica e zjarreve janë vënë nën kontroll. Tre shpërthime mbeten ende të pakontrolluara pranë Laras.
Në Britani , Met Office parashikon se vala e të nxehtit do të godasë Anglinë të hënën dhe të martën dhe ka të ngjarë të thyejë temperaturën rekord prej 38.7 gradë Celsius të vendosur në vitin 2019. Komiteti i reagimit emergjent pritet të mblidhet më vonë sot.
