Fundi i rrugës evropiane të Serbisë? Ministri i Jashtëm rus Sergej Lavrov viziton Beogradin në mes të kritikave të perëndimit ndaj Vuçiç
Nga Amado Çela Përditësimi i fundit 3 Qershor 2022, 14:36
Në Serbi kanë nisur përgatitjet lidhur me vizitën e ministrit të Jashtëm të Rusisë Sergej Lavrov.
Kreu i diplomacisë ruse vjen në Serbi në një kohë kur ushtria e tij gjendet prej më shumë se tre muajsh në Ukrainë.
Kjo është vizita e tij e parë në një vend të kontinentit tonë dhe për më tepër, një vend që aspiron për t’u anëtarësuar në Bashkimin Evropian.
Më herët ai vizitoi Kinën, Indinë dhe Lindjen e Mesme, vende të cilat edhe pse kanë shpallur gjoja neutralitetin nuk e kanë dënuar agresionin rus dhe kanë zhvilluar tregtinë me Moskën gjatë kësaj periudhe lufte.
Edhe presidenti Vuçiç nga Bosnja Hercegovina e pranoi se ardhja e Lavrov në rrethanat aktuale nuk do të jetë si vizitat e tjera.
Ai tha se situata po ndërlikohet dhe shprehu pasiguri për të ardhmen.
Vizita e Lavrov në Beograd vjen në një kohë, kur Bashkimi Evropian ka shprehur pakënaqësinë për rinovimin e marrëveshjes së gazit me Moskën dhe sipas anlistëve, ky akt e lë Serbinë hapa larg integrimit.
Mbetet për t’u parë se sa do të shtohet doza e kritikave, apo edhe akteve politike të Brukselit dhe Uashingtonit kundrejt Serbisë.
Në agjendën e kryediplomatit rus është vizita me Vuçiç, kreun e Kuvendit, Ivica Daçiç dhe kryepeshkopin e Kishës ortodokse serbe, patriarkun Porfirije.
Kujtojmë që Serbia nuk e ka dënuar luftën në Ukrainë dhe është munduar gjoja të mbajë neutralitetin megjithëse marrëveshjet e vazhdueshme me Moskën vërtetojnë të kundërtën, ndërsa i gjithë perëndimi po përpiqet të shkëpusë çdo lloj tregtie me Rusinë.
