Plazhi i Shëngjinit vazhdon të mbulohet nga pluhuri i verdhë, kosto te operatorët turistikë
Nga Elvis Hila Përditësimi i fundit 23 Maj 2022, 14:58
Bregdeti i Shëngjinit edhe këtë të hënë ishte e mbuluar nga pluhuri i verdhë që dyshohet se është polen i pishave i grumbulluar aty nga uji.
Për banorët dhe ekspertët fenomeni natyror është i njohur, por turistët që e hasën për herë të parë u stepëm të futen në det.
“Është e shëmtuar, nuk e di çfarë do të bëhet, por kjo dëmton turizmin.”
“Kjo nuk është fort e pranueshme, por kjo është nga natyra.”
Situata e krijuar po u kushton me shumë operatorëve turistikë.
Thonë se mungesa e informacionit i bën turistët të dyshojnë për ndotje.
“Normalisht ndonjë pyet se çfarë është. Ata duhet ta dinë mos marrin ndonjë infeksion.”
Vonesa e institucioneve për një përgjigje shteruese për fenomenin po ashtu ndikon.
Për rezultatet e analizave të ujit duhet pritur të paktën 5 ditë.
“Ndoshta nuk është e dëmshme për shëndetin, por është rasti i dytë që vjen.”
Fenomeni i polenit u shfaq të shtunën edhe në bregdetin e Velipojës, që ashtu si Shëngjini njihet për masivet me pisha pranë detit.
