Vuçiç: Serbia t'i përgjigjet Kurtit dhe Malit të Zi, do të ketë pasoja të mëdha
Nga OraNews Përditësimi i fundit 21 Mars 2022, 17:16
Presidenti serb Aleksandar Vuçiq tha se Serbia nesër do t'i përgjigjet Prishtinës dhe Malit të Zi.
Ai tha në tubimin parazgjedhor në Kikinda se të gjitha efektet e luftës në Ukrainë dhe gjithçka që po ndodh në Evropë dhe në botë do të diskutohen në seancën e Këshillit të Sigurisë Kombëtare.
“Prisni gjithçka. As Gjukanoviq nuk e kishte bërë këtë, ndaloi votimin në Berane dhe disa vende për zgjedhjet tona, qeveria e Kurtit kërkoi që ne ta njohim pavarësinë e Kosovës për të organizuar votimin. Kurti do të marrë përgjigje, ju dijeni se çfarë përgjigje do të marrin. Përgjigja e njerëzve seriozë dhe të përgjegjshëm, por do të ketë pasoja të mëdha”, tha ai.
Vuçiq ka paraqitur parashikime të këqija për vazhdimin e konfliktit në Ukrainë dhe ka vlerësuar se nuk përjashton konflikte shumë më të mëdha sesa konfliktet vetëm mes dy vendeve.
“Duhet të bëjmë çmos që njerëzit e papërgjegjshëm të mos na tërheqin në diçka të tillë”, përfundoi ai.
Nesër në orën 12 do të mbahet seanca e Këshillit të Sigurisë Kombëtare e Serbisë.
Temat do të përfshijnë refuzimin e Albin Kurtit për mbajtjen e zgjedhjeve në Kosovë, kërcënimet me sanksione ndaj Serbisë dhe furnizimin me naftë për tregun serb.
