Ministri i Jashtëm turk: Turqia e njeh pushtimin rus në Ukrainë si "luftë"
Nga OraNews Përditësimi i fundit 27 Shkurt 2022, 18:14
Ministri i Jashtëm turk Mevlüt Çavuşoğlu tha të dielën se Turqia ka vendosur që pushtimi i Rusisë në Ukrainë është një "luftë".
“A është ky një konflikt apo një luftë? Ne vendosëm për këtë. Neni 19 i Konventës së Montreux është shumë i qartë. Kjo është një luftë.” tha ai në një intervistë të drejtpërdrejtë për CNN-in Turk.
Njohja e Turqisë është e rëndësishme për zbatimin e Konventës së Montreux të vitit 1936 që rregullon kalimin detar në ngushticat turke.
Konventa e Montreux i jep Turqisë një kontroll të caktuar mbi kalimin e anijeve luftarake nga Dardanelet dhe ngushticat e Bosforit që lidhin Egjeun, Marmaranë dhe Detin e Zi.
Në kohë paqeje, anijet luftarake mund të kalojnë ngushticat me njoftim paraprak diplomatik me kufizime të caktuara në lidhje me peshën e anijeve dhe armëve që ato mbajnë në varësi të anijes nëse ajo i përket një shteti të Detit të Zi apo jo.
Gjatë kohës së luftës, kur Turqia nuk është në luftë, anijet luftarake mund të përdorin ngushticat, përveç atyre që u përkasin shteteve ndërluftuese.
Sipas konventës, nëse Turqia është palë e luftës ose e konsideron veten të kërcënuar me rrezik të afërt të luftës, ajo mund të mbyllë ngushticat për kalimin e anijeve luftarake që kanë një bregdet në Detin e Zi ose jo.
Megjithatë, siç përmend Çavuşoğlu, neni 19 i Konventës së Montreux bën një përjashtim. Anijet luftarake të vendeve ndërluftuese mund të kthehen në bazën e tyre të origjinës në Detin e Zi.
