Nuk u nominua për Oscar, reagon aktorja kryesore e filmi kosovar “Zgjoi”
Nga OraNews Përditësimi i fundit 8 Shkurt 2022, 17:11
Filmi “Zgjoi”nuk arriti të nominohet në listën finale për çmimet Oscar.
Ndërkohë aktorja Yllka Gashi e ka quajtur rrugëtim të paharruar suksesin e filmit “Zgjoi”, pavarësisht nominimit.
Në një postim që ka bërë në rrjetet sociale, Gashi që është protagonistja kryesore e filmit kosovar u shpreh e bindur se filmi kosovar do të bëjë histori duke u nominuar e fituar në edicionet e ardhshme të Akademisë.
““Zgjoi” që e punuam me shumë pasion e përkushtim, na hapi dyer e na e mundësoi jo vetëm të kemi shpërthim ndërkombëtar në karrierat tona, por edhe ta promovojmë Kosovën e suksesin e grave të Kosovës! “Zgjoi” na solli gëzim e na bëri krenarë të gjithëve dhe shkroi histori te re për kinematografinë tonë!
Ishte dhe mbetet rrugëtim i bukur e i paharruar, për të cilin jam shumë falenderuese! Falemnderit shumë që u gëzuat për ne e për dashurinë e përkrahjen e jashtëzakonshme që na e keni dhënë tash e një vit! Jam e bindur që në vitet në vijim filmi kosovar do të bëjë histori duke u nominuar e fituar në edicionet e ardhshme të Akademisë. Kosova ka shumë talent e rrëfime autentike të cilat duhet t’i tregojmë”, ka shkrua Gashi në Facebook.
