Baza e NATO-s në Kuçovë, banorët e Moravës në protestë: Tokën e japim vetëm me vlerë tregu

Nga Marko Diko Përditësimi i fundit 27 Dhjetor 2021, 15:22

Banorët e fshatit Moravë në Kuçovë vijojnë protestat kundër vlerës së shpronësimit të tokave që preken nga projekti për ndërtimin e bazës ushtarake. Ata thonë se pronat do ti lëshojnë vetem me vlerën e tregut, përndryshe nuk do lejojnë punimet.

Për herë të tretë brenda muajit, familjet e fshatit Moravë protestuan kundër çmimit të shpronësimit të tokave që preken nga projekti për bazën e NATO-s në Kuçovë.

Të mbledhur para aerodromit, ata thanë se toka është ndër të paktat pasuri që kanë, ndaj kërkojnë shpronësim me çmim tregu.

"Ku ti çoj kalamajtë, çfarë të ushqehemi? Tokën e mbillnim të paktën."

Për çdo vlerë tjetër, pronat thonë se nuk do ti lëshojnë.

"Nuk i lëmë të zhvillohen punimet pa na dhënë vlerësimin sipas tregut."

Banorët e Moravës, shprehen se i janë drejtuar me peticione autoriteteve ku shprehin kundërshtimin për procedurën dhe vlerën e shpronësimit, por sipas tyre deri më sot, askush nuk ka shkuar ti sqarojë.

"Nga Ministria e Mbrojtjes nuk na është dhënë asnjë sqarim."

Sipas përllogaritjeve paraprake, projekti për ndërtimin e Bazës së NATO-s në Kuçovë me vlerë rreth 50 milion euro pret mbi 200 familje që jetojnë përgjatë aksit nacional Dimal-Berat.