“Lufta” e dekreteve në 2021, 28 nisma të mazhorancës u kthyen për rishqyrtim nga Meta
Nga Fjorela Beleshi Përditësimi i fundit 17 Dhjetor 2021, 16:23
Presidenti Ilir Meta ka zhvilluar përballje të forta me mazhorancën gjatë këtij viti pasi ka kundërshtuar 28 herë në mënyrë institucionale Kryeministrin Edi Rama. Me dekrete, kreu i Shtetit ka kthyer për rishqyrtim dhjetëra nisma ligjore të mazhorancës duke nisur që nga taksat, ndryshimet në sistemin e drejtësisë dhe duke e mbyllur me buxhetin e vitit 2022.
Viti 2021nuk ka qenë i lehtë për Presidentin Ilir Meta dhe Kryeministrit Edi Rama, jo vetëm për raportet njerëzore por edhe ato instiucionale.
Përgjatë 12 muajve zyra e Kreut të shtetit nuk ka dekretuar plot 28 nisma të mazhorancës duke i kthyer ato për rishqyrtim në Parlament.
Pakënaqësinë ligjore Ilir Meta e nisi që në mes të janarit kur ktheu dy ligje të miratuara nga PS dhe deputetët e opozitës, për taksat kombëtare dhe tarifat doganore.
Ndërsa piku i dekreteve lidhet me muajin prill, kur u mbajtën edhe zgjedhjet parlamentare.
Akuzat ndërmjet Ilir Metës dhe Edi Ramës nuk u ndalen vetëm tek ato politike, por Presidenti e kundërshtoi ish-aleatin e tij me 8 dekrete.
Nisma ligjore të PS të cilat kishin lidhje me sistemin e drejtësisë, Kreu i Shtetit i ktheu pas me argumentin se mazhoranca kërkonte të merrte nën kontroll pushtetin gjyqësor nëpërmjet votave të deputetëve të opozitës që nuk kishin djegur mandatin apo të tjerët që zunë vendet e përfaqësuesve të PD dhe LSI-së pasi lanë karriget e tyre në Parlament.
Pasi zgjedhjet e 25 prilli përfunduan dhe PS mori mandatin e tretë, Parlamenti shkarkoi me votë Kreun e Shtetit ndërsa 4 muaj më pas Presidenti Ilir Meta fuqinë e dekretit e përdori për të miratuar qeverinë e re të Edi Ramës.
Në muajin e fundit të viti, Kreu i Shtetit i riktheu në Parlament 3 nisma të qeverisë, më i rëndësishmi ai për buxhetin e vitit 2022, të cilin e cilësoi si antisocial dhe jo transparent.
