Nga ndryshimet klimatike te Lojërat Olimpike/ Prioritetet e qeverisë së re gjermane
Nga OraNews Përditësimi i fundit 9 Dhjetor 2021, 13:47
Qeveria e re gjermane me në krye kancelarin Olaf Scholz pritet të vendosë edhe prioritetet në politikën e brendshme dhe atë të jashtme. Një pikë që do të jetë në krye të agjendës janë ndryshimet klimatike.
Ministrja e Jashtme Annalena Baerbock theksoi se kriza klimatike është qendrore në agjendën e saj diplomatike.
"Unë do t'u jap politikave ndërkombëtare të klimës hapësirën që meritojnë në axhendën diplomatike që nga dita e parë," tha ajo.
Ashtu si ministrat e jashtëm të mëparshëm gjermanë, Parisi ishte destinacioni i parë në turneun e saj inaugurues në kryeqytetet evropiane.
"Gjermania nuk ka mik më të ngushtë se Franca", tha kryediplomatja gjermane.
Ajo u takua me homologun e saj francez, Jean-Yves Le Drian, ndërsa mbajën një konferencë për shtyp. Ata cekën edhe temën e Lojërave Olimpike në Pekin që janë bojkotuar nga ShBA-të, Britania dhe Australia.
Për Yve le Drian, europianët do ta trajtojnë këtë çështje në takimin e radhës me ministrat e Jashtëm, ku foli për një qëndrim shumë kërkues ndaj Kinës për çështjen e të drejtave të njeriut.
Përveç politikave të përbashkëta të dy vendeve të rëndësishme të BE-së, homologët diskutuan dhe për krizën në kufirin Poloni-Bjellorusi dhe konfliktin në Ukrainën lindore.
Në kuadër të vizitave të saj inaguruese në vende të ndryshme europiane dhe më gjerë, ajo theksoi rëndësinë e "vlerave bazë" të Bashkimit Evropian. "Ne nuk mund të lejojmë që themelet e Evropës të shemben, veçanërisht me sundimin e ligjit dhe të drejtat e njeriut".
Ministrja e Jashtme Baerbock kishte kandiduar më herët për kancelare për Partinë e Gjelbër në zgjedhjet parlamentare të shtatorit në Gjermani, ku Partia e Gjelbër arriti përqindjen e saj më të lartë të votave, duke u renditur e treta pas Social Demokratëve dhe Bashkimit Kristian Demokrat të ish-kancelares Angela Merkel.
