Probleme nga moti i keq në Gjirokastër, në Lazarat përroi del nga shtrati, bllokohet rruga Kolonjë-Golem
Nga Entiola Budo Përditësimi i fundit 29 Nëntor 2021, 08:59
Moti i keq përgjatë natës ka krijuar probleme në Bashkinë e Gjirokastrës.
Konkretisht gjatë natës ka dalë nga shtrati përroi i Lënxës në fshatin Lazarat, duke krijuar probleme ne qarkullimin e njerëzve dhe makinave që lidhin dy lagjet kryesore të këtij fshati.
Punonjësit e Ndërmarrjes së Shërbimeve kanë punuar me skrep për të hequr inertet që kishin uzurpuar rrugën dhe situata është normalizuar.
Ndërsa problematike qëndron situata në aksin rural Kolonjë-Golem, ku inertet e rëna nga lartësitë si pasojë e shirave, kanë krijuar bllokimin e rrugës.
Momentalisht banorët e Golemit gjenden të izoluar nga pjesa tjetër e vendit si rrjedhojë e kësaj situate.
Moti i keq ka sjellë edhe probleme në furnizimin me energji elektrike. Raportet se pa energji elektrike janë fshatrat e Njësive Administrative Lopës, Luftinjë e Buz në Tepelene e Memaliaj, si dhe fshatrat ne Sukë e Frasher në Përmet.
