Kaos në Sudan/ Pamje nga grushti i shtetit, në arrest shtëpie disa politikanë

Nga OraNews Përditësimi i fundit 25 Tetor 2021, 07:40

Një grup burrash të armatosur kanë vendosur në arrest shtëpine  disa anëtarë të qeverisë kalimtare  të Sudanit, ndërsa kriza politike në vend përshkallëzohet.

Të paktën katër ministra të kabinetit u arrestuan nga ushtarë të paidentifikuar pak para agimit të së hënës ( 25 tetor), raporton BBC.

Gjithashtu thuhet se kryeministri i vendit, Abdallah Hamdok, është në arrest shtëpiak, por kjo nuk është konfirmuar.

Nuk dihet ende se kush fshihet pas arrestimeve.

Vendasit thonë se interneti është ndërprerë në kryeqytetin, Khartoum, ndërsa pamjet e publikuara në mediet sociale tregojnë turma njerëzish duke djegur goma në rrugë.

Grupet kryesore pro-demokratike të Sudanit u kanë bërë thirrje mbështetësve që të rezistojnë çdo "grusht shteti ushtarak".

Arrestimet e raportuara vijnë në mes të tensioneve në rritje midis autoriteteve tranzitore ushtarake dhe civile.

Të dyja palët kanë ndarë pushtetin që nga përmbysja e presidentit Omar al-Bashir në vitin 2019.

 

Por tensionet janë rritur që kur një përpjekje për grusht shteti atribuar pasuesve të Bashirit dështoi në shtator.

Në fillim të këtij muaji, kundërshtarët e tranzicionit të Sudanit në demokraci dolën në rrugët e kryeqytetit, Khartoum, për t'i bërë thirrje ushtrisë që të marrë kontrollin e vendit.

Të enjten, mijëra njerëz demonstruan në Khartoum për të treguar solidaritet për qeverinë tranzitore.

Mbështetja për qeverinë e përkohshme ka rënë në muajt e fundit pasi ekonomia e vendit ka pasur vështirësi./Ora News/