Liderët e BE dhe rajonit në Samitin e Sllovenisë, integrimi në dorë të Francës

Nga OraNews Përditësimi i fundit 6 Tetor 2021, 09:20

Liderët e Bashkimit Evropian (BE) dhe kolegët e tyre nga vendet e Ballkanit Perëndimor do mblidhen sot në samitin e tyre në Bërdo afër Kranjit në Slloveni.

Nga njëra anë, BE-ja pritet të përsërisë përkushtimin për perspektivë evropiane të rajonit të Ballkanit Perëndimor dhe po ashtu vendet e rajonit të përsërisin orientimin e tyre drejt BE-së.

Agjencitë e huaja citojnë diplomatë europianë që shprehen se ka ende skepticizëm te Franca dhe Holanda.

Këto dy vende e refuzojnë propozimin e Sllovenisë për integrimin e të gjithë rajonit në BE brenda vitit 2030, pasi nuk mjafton koha për reformat e kërkuara.

Sipas diplomatëve, Parisi ka rezerva për zgjerimin e shpejtë të Bashkimit Europian me gjashtë vendet e Ballkanit Perëndimor, pasi mund të ndërlikohej më tepër procesi i vendimmarrjes.

Nga ana tjetër, mbetet shqetësimi se vakuumet në rajon do të ftonin rivalët e Perëndimit, si Turqinë, Kinën e Rusinë.

Beogradi dhe Podgorica i kanë hapur më parë negociatat për anëtarësim; Tirana dhe Shkupi janë në pritje të vendimit pozitiv nëse Bullgaria do të heqë dorë nga vetoja për Maqedoninë, ndërsa Kosova dhe Bosnja mbeten vende kandidate për t'u bërë pjesë e familjes europiane.

Pritet të arrihen marrëveshje

Megjithëse në samitin e fundit në Berlin nuk u arrit asnjë marrëveshje, kësaj radhe edhe pas vizitës së presidentes së Komisionit Evropian, Ursula von der Leyen në rajon do të tentohet sërish të nënshkruhet dakordimi i gjashtë shteteve rajonale për lëvizjen e lirë me ID karta dhe njohjen e diplomave.

Në samitin në Slloveni do të jetë edhe kancelarja e Gjermanisë, Angela Merkel. Sllovenia kryeson aktualisht presidencën e radhës në BE.