Kërkesat e Kurtit, Haradinaj: Dështim! E habitshme pse njohja e Kosovës nuk është prioritet i tij
Nga OraNews Përditësimi i fundit 15 Qershor 2021, 16:35
Kreu i AAK-së, Ramush Haradinaj, i ka cilësuar si dështim kërkesat e Albin Kurtit në diskutimet për dialogun me Serbinë në Bruksel.
Nëpërmjet një postimi që ka bërë në rrjetet sociale, Haradinaj shprehet se është e habitshme që njohja e Kosovës nuk është prioritet i tij.
“Dështim i plotë i Kryeministrit Kurti në procesin e dialogut.
Është e habitshme, pse njohja e Kosovës nuk është prioritet i tij. Prioritet i parë i tij na qenka shndërrimi i CEFTA-s në SEFTA. Qesharake. Ashtu si edhe prioriteti i dytë, marrëveshja për paqe mes dy vendeve, e po ashtu edhe qasja për të pagjeturit.
Njohja reciproke është i vetmi rezultat që i duhet Kosovës nga ky dialog. Njohja nënkupton edhe paqen, edhe statusin më të avancuar ekonomik, por edhe hap shtigje për zbulimin e të vërtetës për të pagjeturit.
Përndryshe, kjo qasje për të biseduar për tema, pa e njohur shtetet njëra tjetrën, siç kishte ndodhur më parë në procesin e dialogut, nuk ka rezultate, e në këtë fazë është edhe e rrezikshme për vendin,” shkruan Haradinaj.
Kryeministri Albin Kurti është takuar ditën e sotme në Bruksel më Presidentin Serb, Aleksandër Vuçiç, në kuadër të dialogut.
