UEFA hap hetim ndaj Juves, Barçës dhe Real Madrid
Nga OraNews Përditësimi i fundit 12 Maj 2021, 14:33
Tani është edhe zyrtare. UEFA ka nisur një hetim disiplinor ndaj Juventusit, Barcelonës dhe Real Madridit, tre klubeve të cilët ende nuk kanë braktisur projektin e Superligës.
Janë këto 3 ekipe që zyrtarisht nuk kanë bërë asnjë hap pas për t’u tërhequr nga projekti që zgjati vetëm 2 ditë dhe që panë të gjithë anëtarët e tjerë të braktisin këtë ide.
Sipas njoftimit, UEFA ka emëruar inspektorët e etikës dhe të disiplinës si përgjegjës të hetimit lidhur me Superligën ndërsa bëhet e ditur se të tjera informacione do të vihen në dispozicion në kohën e duhur.
Hetimi disiplinor është hapi i parë zyrtar i UEFA-s ndaj tre klubeve anëtare të saj ndërsa pas hetimit çështja kalon në Komisionin e Etikës dhe të Disiplinës të cilët më pas kanë në dorë në bazë të provave të vendosin për ndëshkimet e mundshme ndaj 3 klubeve.
Presidenti Ceferin e pati paralajmëruar se Barcelona, Real Madrid dhe Juventusi do të përballeshin me masa nëse nuk tërhiqen nga projekti i Superligës dhe asnjë prej tyre nuk u përpoq të bënte një hap pas dhe tani rreziku i një përjashtimi të mundshëm nga Kupat e Europës për ta është real.
