“Aman më ndihmoni” familja e varfër në Tropojë apel për ndihmë: Kemi mbetur pa shtëpi
Nga OraNews Përditësimi i fundit 18 Mars 2021, 20:31
Shtëpia e tij është bërë e pabanueshme, ndërsa Izet Preçi së bashku me bashkëshorten e tij jetojnë aktualisht në shtëpinë e vëllait.
Burrë e grua nga fshati Luzhë të Tropojës, vuajnë të dy nga sëmundja e pakurueshme e epilepsisë.
Me të ardhura të pakta që shumica e tyre shkojnë për medikamente, kryefamiljari bën thirrje për ndihmë.
“Aman më ndihmoni nga shteti. Vendosni dorën në zemër, se jam i detyruar të ngre një çadër. Nuk ka ardhur askush të më ndihmojë, jam mbetur pa shtëpi. Vetë jam i sëmurë. Marr 100 mijë lekë përkrahje.”
Edhe kryetari i fshatit Luzhë, tregon situatën e rëndë që jeton Preçi.
“Nëse keni mundësi vendosni dorën në zemër për ta ndihmuar këtë familje. Kërkesa kryesore është për një banesë.”
Në pamundësi për ta ndihmuar, edhe banorët e tjerë apelojnë për ndihmë.
“Ka probleme të tjera, gruan e ka të sëmurë. Si mos më keq. Kush mund t’i ndihmojë, sevap është.”
Thirrja shkon për Bashkinë Tropojë, për të gjetur një zgjidhje për familjen e cila së shpejti duhet ta lëshojë shtëpinë ku aktualisht jetojnë.
