Transferime në Tiranë për vota, Kaso: Loja e pistë nuk do ta ndihmojë Ramën, do të humbë në gjithë Shqipërinë
Nga OraNews Përditësimi i fundit 18 Mars 2021, 17:40
Një ditë pas denoncimit të emisionit investigativ "BOOM" në Rtv Ora të transferimit të votuesve në Tiranë me një telefonatë nga zyrat elektorale të PS-së, ka ardhur edhe reagimi i Partisë Demokratike.
Sekretari për Çështje Zgjedhore në Partinë Demokratike, Ivi Kaso, akuzoi kryeministrin Rama se po tenton të vjedhë zgjedhjet por nuk do t'ja dalë.
Ai u shpreh i bindur se loja e pistë me importimin e votuesve nga qytetet e tjera më Tiranë, nuk do ta ndihmojë Ramën.
Kaso: Edi Rama humb kudo në Shqipëri, madje edhe në Tiranë. Ja pse kryeministri në largim po tenton të vjedhë zgjedhjet. Është e pamundur të ndalosh qytetarët shqiptarë, të cilët duan ndryshimin dhe kjo po e tërbon Edi Ramën. Mbrëmë, emisioni investigativ “Boom” solli prova filmike se Edi Rama dhe Erion Veliaj kanë importuar mijëra vota në Tiranë.
Importimi i votuesve me kontrata fiktive të shtëpive, tregon se Edi Rama nuk luan me rregulla të ndershme loje, sepse ai ka frikë nga humbja. Loja e pistë me importimin e votuesve nga qytetet e tjera më Tiranë, nuk do ta ndihmojë Ramën. Ai do të humbë kudo – në Tiranë, Elbasan, Durrës, Shkodër, Korçë, në Fier, kudo.
Në mënyrë që të sjellim një ndryshim të vërtetë për vendin tonë, ne duhet të fillojmë rrugën e sigurt drejt Bashkimit Europian. Mënyra e vetme për të bërë këtë është të votohet për Partinë Demokratike nën udhëheqjen e Lulzim Bashës.
Të nderuar qytetarë, dilni dhe votoni!Së bashku ne do të sjellim ndryshim dhe një të ardhme më të mirë për të gjithë ne!
