Sekuestrohen 14 kg kokainë dhe 287 mijë euro në një kamion drejt Greqisë, arrestohet shoferi shqiptar
Nga OraNews Përditësimi i fundit 28 Dhjetor 2020, 19:02
Më shumë se 14 kilogramë kokainë dhe 287,060 euro në një kamion që drejtohej nga një shtetas shqiptar u kapën nga policia greke në zonën e Lykovrysi, Atikë gjatë një kontrolli të papritur.
Sipas policisë greke, Seksioni i Drogës kishte informacion në lidhje me importin dhe trafikimin e sasive të konsiderueshme të drogës në vend dhe pas veprimeve të veçanta identifikoi dhe lokalizoi drejtuesin e kamionit, i cili mbërriti në Patras nga Ankona, Itali.
Gjatë kontrollit, brenda kamionit të transportit që i përket një kompanie bullgare u gjetën dhe sekuestruan 13 pako me 14 kg 45 gram kokainë, 7 gram marijuanë, 287 mijë e 60 euro, 1 celular. Gjithashtu, një shumë e madhe parash ishte fshehur me kujdes brenda kabinës së kamionit, raporton CNN Grecce
Rasti u zbulua nga Seksioni i Drogës në Atikë, në bashkëpunim me Rojet Bregdetare të Patras, të mërkurën e kaluar, (23.12.2020) ndërsa hetimet janë duke u zhvilluar nga autoritetet greke në bashkëpunim me autoritetet italiane dhe Interpol, për të identifikuar furnizuesin dhe rrjetin e transportit dhe trafikimi në Europë.
