Një 19 vjeçar në kërkim për atentatin ndaj shefit të Policisë Bashkiak të Malësisë së Madhe
Nga OraNews Përditësimi i fundit 12 Tetor 2020, 10:02
Një 19 vjeçar është shpallur në kërkim për atentatin ndaj shefit të Policisë Bashkiake të Malësisë së Madhe, Mentor Hasanaj.
Policia e Shkodrës informoi sot se provat shkencore dhe biologjike kanë çuar drejt identifikimit të 19 vjeçarit Ilirjan Hasanaj si autori i dyshuar për atentatin e ndodhur mesditën e 11 tetorit 2020, në aksin rrugor Shkodër-Koplik. Në atentat mbeti i plagosur rëndë dhe babai i Mentorit ndërsa shpëtoi bashkëshortja e tij.
19 vjeçari është banues në lagjen “Tepe”, Shkodër. Ai rezulton të jetë djali i Arben Hasanajt, ish-polici i Kufirit i cili prej tre vitesh është larguar nga vendi.
"Ky shtetas, më datë 11.10.2020, në orën 12:30, në aksin rrugor Shkodër-Malësi e Madhe, te rrethrrotullimi i “5 Heronjve”, ka qëlluar me armë zjarri dhe ka plagosur rëndë shtetasit M. H. 39 vjeç banues në Grudë Fushë, Malësi e Madhe, me detyre përgjegjës i Policisë Bashkiake Malësi e Madhe dhe shtetasin Xh. H., 74 vjeç, banues në Grudë Fushë, Malësi e Madhe, të cilët po udhëtonin nga Shkodra drejt Malësisë së Madhe, me automjetin tip “Skoda”, në pronësi të Bashkisë Malësi e Madhe" informoi sot policia e Shkodrës.
Dëshmia e shefit të policisë bashkiake të Malësisë së Madhe: Atentati nuk ka lidhje me punën
Babai i Mentorit, Xhelal Hasanaj, 70 vjeç, ndodhet në gjëndje kome në spitalin e Shkodrës, ndërkohë 37 vjeçari është sjellë në spitalin e Traumës në Tiranë
Sekuestrohen provat
Sekuestrohet motomjeti i përdorur gjatë kryerjes së krimit. Motori pa targa, u gjet në vendin e quajtur Livadhe. Gjithashtu u gjjet një skafandër dhe sende të tjera që ishin përdorur nga autori i ngjarjes.
Si ndodhi atentati
Ata po udhëtonin në aksin rrugor Shkodër-Koplik me makinën zyrtare të Policisë Bashkiake të Malësisë së Madhe, kur u sulmuan me armë zjarri nga një motor. Nga breshëria e plumbave u goditën Mentor Hasanaj, 37 vjeç dhe babai i tij Xhelal Hasanaj, 70 vjeç, ndërsa Bashkëshortja e policit, Vjollca Hasanaj që po ashtu ndodhej në makinë shpëtoi mrekullisht.
Shkaku?
Shërbimet e Drejtorisë Vendore të Policisë Shkodër, në bashkëpunim me ata të Malësisë së Madhe, vijojnë intensivisht punën për lokalizimin dhe kapjen e autorit të dyshuar.
Nën drejtimin e Prokurorisë, strukturat hetimore të DVP Shkodër po vijojnë punën për zbardhjen e shkakut të kësaj ngjarjeje.
Materialet iu referuan Prokurorisë së Rrethit Gjyqësor Shkodër, për veprat penale “Vrasja e më shumë se një personi” mbetur në tentativë dhe “Armëmbajtja pa leje”.
