Promovimi turistik i Shqipërisë, qeveria fton shqiptarët t'i bashkohen fushatës
Nga OraNews Përditësimi i fundit 23 Maj 2014, 16:34
Qeveria shqiptare ka ftuar të gjithë shqiptarët që t’i bashkohen fushatës për promovimin turistik të Shqipërisë. Ftesa ëshë bërë nëpërmjet Drejtorit të Komunikimit në Qeveri, Endri Fuga, i cili i fton të gjithë të vizitojnë faqen newalbania.tumblr.com, për t’ju bashkuar nismës “Ndiq rrugën tënde”. Ndërkohë që ekspertët e “StrawberryFrog” do të bashkëpunojnë ngushtë me Ministria e Turizmit dhe Ministria e Ekonomisë.“Kemi të bëjmë me një lëvizje e cila synon të promovojë vendin tonë dhe duke qenë se bëhet fjalë, në fund të fundit për promovimin e Shqipërisë, Qeveria shqiptare dhe kompania fituese, “StraëberryFrog”, dëshirojnë të ftojnë secilin prej jush të vizitoni faqen e internetit newalbania.tumblr.com, ku jo vetëm mund të shikoni disa nga konceptet e zhvilluara deri më sot, por edhe të komentoni dhe të sugjeroni, duke dhënë mendime, ide të reja, për këtë nismë kaq të rëndësishme për të ardhmen e Shqipërisë”, thuhet në deklaratën e Fugës.Javën e kaluar përfundoi konkursi ndërkombëtar për imazhin e ri të Shqipërisë, ku juria ndërkombëtare përzgjodhi si firmë fituese kompaninë “StraëberryFrog”. Kompani, e cila ka një eksperiencë të gjerë në fushën e promovimit, qoftë në fushën e turizmit, ashtu edhe në fushën e investimeve të huaja.“Sigurisht që puna e deritanishme e bërë nga “StrawberryFrog” ka qenë një punë e izoluar, ndërkohë që në javët në vijim ekspertët e tyre do të punojnë ngushtazi me ekspertë shqiptarë nga Ministria e Turizmit dhe Ministria e Ekonomisë, për të zhvilluar një koncept imazhi sa më profesional, sa më efikas, për realitetin e Shqipërisë, por dhe mënyrën sesi vendi ynë shihet nga të huajt”, shkruan Endri Fuga.
