Ecuri pozitive e ekonomisë shqiptare/ FMN: Rritje e qëndrueshme, pavarësisht sfidave gjeopolitike
Nga OraNews Përditësimi i fundit 3 Qershor 2026, 12:21
FMN vlerësoi se ekonomia shqiptare vijon të mbetet e qëndrueshme, me rritje ekonomike, treg pune më të fortë dhe kushte të favorshme financiare. Misioni konfirmoi se forcimi i lekut lidhet me përmirësimet strukturore të ekonomisë cka sjell përfitime për ekonominë shqiptare
Ekonomia shqiptare vijon të tregojë qëndrueshmëri dhe perspektiva pozitive zhvillimi, e mbështetur nga rritja e aktivitetit ekonomik, përmirësimi i tregut të punës dhe kushtet e favorshme financiare.
Ky ishte vlerësimi i misionit të Fondit Monetar Ndërkombëtar, i kryesuar nga shefi i Misionit për Shqipërinë, Diego Cerdeiro, në një takim me Guvernatorin e Bankës së Shqipërisë, Gent Sejko, në përfundim të një misioni në vendin tonë.
Diskutimet, sipas njoftimit të Bankës së Shqipërisë, u fokusuan në zhvillimet aktuale makroekonomike, politikën monetare, stabilitetin financiar dhe perspektivat e ekonomisë shqiptare.
Përfaqësuesit e FMN-së vlerësuan se ekonomia shqiptare vazhdon të mbetet rezistente ndaj goditjeve të jashtme, ndërsa perspektiva ekonomike paraqitet përgjithësisht e favorshme.
Megjithatë, ata theksuan se pasiguritë që lidhen me zhvillimet ndërkombëtare dhe tensionet gjeopolitike kërkojnë monitorim të vazhdueshëm.
Sa i përket inflacionit, misioni evidentoi ndikimin e rritjes së çmimeve të energjisë dhe rëndësinë e mbikëqyrjes së pritshmërive inflacioniste.
FMN vlerësoi analizat dhe parashikimet e Bankës së Shqipërisë, duke e konsideruar politikën monetare të ndjekur si të përshtatshme dhe të orientuar drejt ruajtjes së stabilitetit të çmimeve.
Misioni i FMN-së konfirmoi se forcimi i lekut është një fenomen i përcaktuar nga përmirësimet strukturore në ekonominë reale dhe se një regjim i lirë i kursit të këmbimit është i dobishëm dhe sjell përfitime për ekonominë shqiptare. Aktualisht, një euro këmbehet me rreth 95 lekë.
Nga ana e tij, Guvernatori Sejko rikonfirmoi se Banka e Shqipërisë do të vazhdojë të ndjekë një politikë monetare të kujdesshme dhe të bazuar në të dhënat më të fundit ekonomike, me synimin për të garantuar kthimin dhe ruajtjen e inflacionit pranë objektivit të saj afatmesëm.
Gjatë takimeve u diskutuan edhe sfidat afatgjata të ekonomisë shqiptare, përfshirë zhvillimet demografike, rritjen e produktivitetit dhe ndikimin e procesit të integrimit evropian në perspektivat ekonomike të vendit.
