VIDEO/ Fitueset e debatit mes shkollave në “Flasim”: Të rinjtë po evidentojnë talentin në komunikim dhe mendim kritik
Nga OraNews Përditësimi i fundit 31 Maj 2026, 16:34
Kryeministri Edi Rama priti sot në podcastin “Flasim” vajzat fituese të debatit mes shkollave të Tiranës, të cilat ndanë eksperiencën e tyre në këtë kompeticion dhe rëndësinë që ka debati në formimin e të rinjve.
Gjatë bisedës, të rejat treguan se konkursi kishte kaluar në disa faza eliminatore deri në finale, ndërsa theksuan se gara ka qenë sfiduese dhe ka kërkuar përgatitje të vazhdueshme, punë në grup dhe argumentim profesional.
Njëra prej pjesëmarrëseve u shpreh se fillimisht ishte pjesë e skuadrës fituese të debatit të shkollës, ndërsa më pas mori pjesë edhe si gjyqtare në edicionet pasuese të aktivitetit.
Ajo tha se eksperienca e debatit i ka ndihmuar të zhvillojnë aftësi komunikimi, analizimi dhe përfaqësimi publik.
Vajzat shpjeguan edhe mënyrën e organizimit të garës, duke theksuar se skuadrat ndaheshin në role të ndryshme, ku secili anëtar kishte detyra specifike për paraqitjen e argumenteve, statistikave dhe përmbledhjen përfundimtare të debatit.
Sipas tyre, debatet janë zhvilluar në ambiente të ndryshme, përfshirë Kuvendin e Shqipërisë dhe institucione arsimore, me synimin për të rritur frymën konkurruese dhe për të afruar të rinjtë me kulturën e debatit dhe mendimit kritik.
Në podcast u diskutua edhe mbi temat që trajtoheshin në gara, ku të rinjtë argumentonin si në mbështetje ashtu edhe kundër çështjeve të ndryshme sociale dhe publike.
Kryeministri Rama vlerësoi angazhimin e të rinjve në debate dhe rëndësinë që ka zhvillimi i aftësive komunikuese dhe qytetare, ndërsa pjesëmarrëset shprehën dëshirën që kjo nismë të zgjerohet edhe në shkolla të tjera të vendit.
Ato theksuan se aktivitete të tilla ndihmojnë në evidentimin e talenteve të reja në komunikim dhe në krijimin e një kulture më të fortë debati mes të rinjve.
