LIBAN/ Izraeli pushton një kështjellë mes operacioneve për zgjerim
Nga OraNews Përditësimi i fundit 31 Maj 2026, 16:27
Ushtria izraelite tha sot se kishte pushtuar kështjellën e njohur ”Beaufort”, një pikë strategjike në Libanin jugor, dhe se po zgjeronte operacionet e saj tokësore kundër milicisë Hezbollah në zonë.
Një foto tregoi një flamur izraelit që ngrihej në fortesën e ndërtuar nga kryqtarët në shekullin XII.
Një zëdhënës nuk pranoi të jepte detaje mbi pushtimin e vendit, të cilin ushtria e përshkroi si një “simbol të arrogancës së Hezbollahut”.
”Forcat izraelite tani po synojnë platformat e afërta të lëshimit të raketave që përdoren nga milicia shiite e mbështetur nga Irani në sulmet e saj”, tha ushtria.
E dëmtuar rëndë nga bombardimet e fundit, fortesa e lashtë ndodhet pak në veri të lumit Litani, pas të cilit Hezbollah duhej të tërhiqej sipas një marrëveshjeje me Izraelin.
E vendosur në një lartësi prej 700 metrash me pamje komanduese të zonës përreth, ajo është pranë një zgjatimi të prekshëm të kufirit verilindor të Izraelit.
Kështjella ”Beaufort” ishte më parë skenë luftimesh gjatë pushtimit izraelit prej rreth 20 vitesh deri në vitin 2000.
Kryeministri i Libanit, Nawaf Salam, akuzoi Izraelin për shkaktimin e shkatërrimeve të gjera në Libanin jugor.
Sipas agjencisë shtetërore të lajmeve NNA, ai i dënoi sulmet izraelite si një “përpjekje për të fshirë historinë”.
”Kostoja e luftës për popullin libanez është e madhe dhe vendi nuk duhet të bëhet një gur shahu në konfliktet rajonale”, theksoi Salam.
