Papa Leo XIV ngre zërin kundër luftës: Askush nuk duhet të largohet nga shtëpia për shkak të bombardimeve dhe frikës
Nga OraNews Përditësimi i fundit 31 Maj 2026, 08:16
Përpara besimtarëve të mbledhur në Vatikan, Papa Leo XIV bëri thirrje për paqe në mbarë botën, në një kohë kur konfliktet dhe dhuna vazhdojnë të prekin shumë vende.
Gjatë lutjes së rruzares, ai foli për vuajtjet që po përjetojnë mijëra njerëz të detyruar të largohen nga shtëpitë e tyre për shkak të luftërave, bombardimeve dhe pasigurisë. Papa tha se askush nuk duhet të jetojë me frikën e humbjes së familjes apo të vendit ku është rritur.
Ai u ndal edhe te gjuha e urrejtjes dhe dëshira për pushtet, duke bërë thirrje që ato të zëvendësohen me drejtësi, respekt dhe të vërtetë. Sipas tij, paqja mund të arrihet nëse dëgjohen zërat e atyre që vuajnë, veçanërisht fëmijët, prindërit, refugjatët dhe të burgosurit që përballen me vështirësi çdo ditë.
Në mesazhin e tij, Papa kujtoi se ndërtimi i paqes nis nga veprimet e secilit, duke kërkuar shmangien e dhunës dhe fyerjeve, si në jetën e përditshme ashtu edhe në rrjetet sociale.
“Paqja nuk është një ide e largët apo një ëndërr e paarritshme. Ajo ndërtohet çdo ditë përmes zgjedhjeve dhe sjelljes sonë ndaj të tjerëve”, ishte mesazhi që përcolli në përfundim të lutjes në Vatikan.
