MENYJA/ Helmimi masiv i studentëve të Akademisë, një ngjarje e paralajmëruar nga “Ora News”
Nga Alketa Çeku Përditësimi i fundit 7 Maj 2026, 12:18
Rreth 55 studentë të Akademisë së Sigurisë janë helmuar pas konsumimit të ushqimit në ambientet e institucionit.
Menjëherë pasi kanë konsumuar drekën, studentët kanë pasur te vjella dhe diarre, ndërsa disa prej tyre janë transportuar menjëherë drejt QSUT-së për të marrë ndihmën e parë mjekësore.
Burime për Ora News bëjnë me dije se vakti që kanë konsumuar ka qenë presh me mish dhe brokoli.
Në foto: Menyja e djeshme për tudentët e Akademisë
Kompania përgjegjëse për ushqimin është "Sori-Al" SHPK. Kjo kompani rezulton në regjistrat e biznesit në emër të Alma Tafanit, bashkëshortes së Nikolin Jakës. Burime policore bëjnë me dije se kanë shpallur në kërkim Administratoren e kompanisë Alma Tafani. Kjo ngjarje e rëndë që ndodhi sot është paralajmëruar më herët nga televizioni “Ora News”.
Një investigim disa mujor i gazetares Alketa Çeku ka faktuar mënyrën skandaloze të shpërndarjes së ushqimit për të sëmurët në QSUT. Edhe pse me dokumente, kompania KPL që shpërndante ushqim ishte në emër të shtetasit Ramazan Troka, pas saj qëndronte Alma Tafani. Investigimi faktoi se furgonat që shpërndanin ushqimin rezultonin te subjektit SORI-AL. Mënyra se si shpërndahej ushqimi për të sëmurët ishte skandaloze.
Ne mungesë të mjetit që të shpërndarë ushqimet punonjëset e kompanisë shihen në oborrin e QSUT me qeset e ngjeshura me ushqim dhe me çadër ne dorë duke shkuar nga pavioni në pavion për t’i çuar supën të sëmurëve.
Televizioni Ora News ka faktuar se mënyra e shpërndarjes së ushqimeve ka qenë tejet e rrezikshme, pasi shpesh ushqimi qëndronte në mëshirë të fatit te stolat e korridorit të spitalit.
Paralajmërimet e vazhdueshme të “Ora News” për mënyrën skandaloze të trajtimit dhe shpërndarjes së ushqimit duket se morën konfirmimin më të rëndë me helmimin e dhjetëra kursantëve të Akademisë së Sigurisë.
Kur denoncimet publike shpërfillen, pasojat nuk mbeten më thjesht skandal administrativ, por kthehen në rrezik të drejtpërdrejtë për jetën.
